Berîtan Canozer

 

AMED - Avûkat Gulan Çagan Kalelîye derheqê tahliyekerdişê gumabarê tecawizî Musa Orhanî de qalî kerd û vat: “Hîsê netewperestî û mîlîtarîst yenê weykerdene û hewl yeno dayene ke rastîyan binimnê. La ma do cigêrayîşê edaletî dewam bikerê.”

 

Cinîya bi nameyê Îpek Era 18 serrî, Sêrtî de bi tecawizê çawîşê pispor Musa Orhanî de rî bi rî mende bî û 16ê temmuze de întîxar kerdebî. Keyeyê aye, aye berdib nêweşxane û serrê gerrekerdişê keyeyê de Musa Orhan amebi tepiştene û la roja bîn amebi veradayîş. Îpeke 33 rojî nêweşxane de mende 18ê tebaxe de merde.

Serê reaksîyonê de Musa Orhan 19ê tebaxe de ame tepiştene û dimayê çend rojan serbest ame veradayene. Avûkat Gulan Çagan Kalelîye derheqê dosya de şîrove kerd.

 

‘Îpeke teda bi hawayêko akerde îfade kerd’

 

Gulane vat, Îpeke dimayê ke agerêna verê keyeyê xo, heme çî keyeyê xo rê qalî kena û şinê gerre kenê û vat: “Her çî dozgerîye rê qalî kenê. Hêrişê cinsî, desteserkerdiş û tedayê psîkolojîkî qalî kerdê. Heta îfadeyê xo de vana, ‘wa gumanbar bi hawayêko giran bêro cezakerdene. Ez şew û roje bermena, ameya sewîyey întîxarî, ez şerm kena rîyê keyeyî biewnî.’ No esas de qêrînayîşê hetkarî yo. La dozgerî dimayê nê çîyêk nêkerdo.”

 

‘Ma do cigêrayîşê edaletî dewam bikerê’

 

Gulane dewam de dîyar kerd ke Îpeke verê întîxar bikera, mektub nuşta û nê mektubî pêşkêşê serdozgerîya komara ya Sêrtî hem zî serdozgerîya Komara ya Êlihî ameya kerdene. La serdozgerîya komara ya Sêrtî îdianameyê amade kerd de tena ca dayê sûcê hêrişê îstîsmarê cinsî û vat, înan serdozgerîya komara ya Êlihî sûcê ‘întîxar ferzkerdene’ muracatê sûcî kerdê. La aqûbetê nê muracatê dîyar nîyo. Gulane sewbîna dîyar kerd ke ê mecbûrî ke seba heqê xo mucadele bikerê û do cigêrayîşê edaletî dewam bikero.