Hîkmet Tunç

 

WAN - Hemsereka HDPyî Erdîşê Wanî Sarya Bîlîcî dîyar kerd ke pêvînayîşê bi keyeyî dir vejîyayo meydan ke xeylê cinî rastê teda û şîdetê keyeyî yenê. Sarya sewbîna dîyar kerd ke bi tesîrê qeyûmî zî serê merdişê bigumanan esto û vat, cinî bê alternatîf ameyî verdayîş û cinîyan erşawenê keyeyê ke şîdet vînenê.

 

Îqtîdarê AKP-MHP ke Pêameyîşê Stenbolî hedef nîşan danê û plan kenê ke pêameyîş ra fek vera bidê, merdişê cimîyan her ke îino zêde beno. Derheqê vernîgirewtişê şîdetê serê cinîyan de tu tedbîrî nînê girewtene. Qezaya Erdîşê Wanî de zî merdişê biguman yê cinîyan her ke şinê zêde benê. Verê roşanê qurbanî Nuran Hasare bi guman merde. Ame zanaye ke Nurane digane bî û hîrê domanê aye bî. Reyna 20ê tebaxe de taxa Golagzi Pinar Altaşa 37 serrî keyeyê tenûre de ya verê keyeyê xo de merde ameye vînayene. Ama îdiakerdene ke her di cinîyan zî întîxar kerdo.

 

‘Keye de vengê pêrodayîşan bîyo’

 

Hemsereka Partîya Demokratîkî ya Şaran (HDP) ya Erdîşî Sarya Bîlîcîye ke şî her di keyeyan dir pêvînayîş kerd û wina vat: ”Her di cinî zî digane bî. Gelo cinîyêka digane çira xo bikşo? No nîno cigêrayîş. Keyeyêk ma bi israr rastî vatişî, ‘ma nêzanê, dewlete zana’ ameyî. La cîranan ra ma musayî ke verê her wdxt keye ra vengê pêrodayîşî ameyo. No zî ramojneno ke keye de rastî şîdetî ameya. Tu merdiş rewşêka rêze ra nîyo. Merdişê biguman bi întîxarî dir nêeşkeno bêro nimtene.”

 

‘Qeyûm cinîyan mehkûmê şîdetî kerd’

 

Sarya dîyar kerd ke zêdebîyayîşê şîdetê serê cinîyan de tesîrê qeyûman xeylê zêde yo û sebebê nê zî oyo ke qeyûman projeyê cinîyan betal kerdê, xebatê cinîyan betalkerdî, merkezê cinîyan padayê. Sarya tewr peyîn wina vat: “Ganî ma hemverê şîdetî têkoşîn bikerê. Belê qeyûm tayînê şaredarîyê ma ameyê kerdene. Wareyê têkoşînê ma yenê tengkerdene. La ma do her tim têhet bê û vera nê vinderê.”