ŞIRNEX - Şirnex de cinîyê ke keyeyê înan ameyî rijnayene û TOKÎyan de ameyî bicakerdene, fek kulturê xo yê nanpewtişî ra vera nêdayî û cayê ke ameyî bicakerdene zî kulturê xo dewam kenê.

 

Taxa Gazîpaşayî Şirnexî de awanîyê TOKÎyan de, cinîya bi nameyê Nurcan Altûrka ke xo rê firine akerda, lavaş viraznena û hem nanê tewqe û hem zî nanê tenûre pewijnena. Nurcane ard ziwan ke mîyanê TOKÎyan de xeylê zehmetîyan ancenê û wina vat: “Şirnex de reya ewilo ke firinêke hetê cinîyan ra ameya akerdene û xebatkarê ci heme cinî yê. Ma komelê Şirnexî rê cinîyan da qebulkerdene û vatişê ‘cinî nêeşkena’ da şiknayîş.”

 

‘Ma seba firina ke abikerê zaf ca geyrayî’

 

Nurcane dîyar kerd ke destpêk de seba akerdişê firine zêde cayan geyrayê û vat: “Dimayê cigêrayîşê ke ma kerd, ma TOKÎ de xo rê ca peyda kerd. Kesê ke nê awanîyan de ameyê bicakerdene, xeylê zahmetîyan ancenê. Semedo ke cuyêka winasî tesdîq nêkenê. Şirnex de reya ewilo ke cinî karê firine kenê. Ma cinî her ca de bê. Nika tîya de nêzdîyê 10 cinî xebityenê. Ma nika nanê tewqe, tenûre û lavaşan viraznenê. Ma nanê tenûre bi taybetî zimistanî xeylê zêde viraştêne. Labelê nika seba hamnanî û paca akerdişî seba ke ma tu kesî aciz nêkerê ma mabêne daya.”

 

‘Ma bi komelî da qebulkerdene’

 

Nurcane dîyar kerd ke karê firine zaf zehmet o û wina vat: “Ma cinî zî eşkenê karê firine bikerê. Ma serê sibayî saete 5 de wirzenê, yenê firine û nanê xo viraznenê. Ma heta 8ê şan de zî xebityenê. Her çiqas karê ma zehmet bo zî keda ke ma danê kêfê ma ano. Şirnex de hem seba nêzdîbîyayîşê komelî û hem zî seba cayê xebate zêde çin o, cinî nêeşkenê zêde bixebityê. Komel seba ma nê karî kerd, kêfweş bi. Her kesî ma pîroz kerd. No zî ma kêfweş keno. Me vatişê komelî ke vanê, ‘cinî nêeşkena’ veng vet.”

 

‘Wexto ke cinî biwazo eşkena pêro karan bikera’

 

Nurcane vat ke mîyanê TOKÎyan de zaf zehmetî ancenê û wina vat: “Eke cayê firina ma vernîya ci akerde bîne, ma do wina zehmetî nêantêne. Wexto ke mi na firine akerd, keyeyê mi nêwaştêne ez nê karî bikerî. La mi waşt ke bi keda xo serê lingan de bimanî. Ez nêwazena mihtacê camêrdan bî. Coka mi no ca akerd. La nika zaf kêfê keyeyê mi ame û paştdayîş dayî mi. Tu hêz nêeşkeno ma asteng bikero. Ma do her wext serê linganê xo de vinderê.”