AMED - Welatîyan reaksîyon vera xebatanê rantî ke binê nameyê, 'restorasyonî' de Sûra Amedî yenê kerdene dayî û vatî: “Wazenê ke vîyarteyê ma pak bikerê. Ercanê ma açernenê rant, ma hemverê nê çî yê.”

 

Sûrê tarîxî yê Amedî zî binê nameyê restorasyonî de texrîbatêko pîl yeno kerdene. Beşêk Sûrê Amedî, resenê Huriyê Verê Bîyayîşî serra 3 hezarî, beşêk zî resenê 2yîn Împaratorê Bîzansî Konstantînus yê serra 346. Sûrê Amedî hem hetê turîstê herême, hem zî hetê xerîban ra eleqeyêko pîl vînenê.

 

Ame îdiakerdene ke îhale rê yenê akerdene

 

Sûrê ke bi hezaran serrî yo serê lingan de yê, serrê 2015-2016 de bi qedexeyê tebervejîyayîşê kuçeyan de ameyî texrîbkerdene. Serê talîmatê Wezaretê Kultur û Turîzmî, hetê şaredarîya Sûrî ke Qeyûm îdare kerdêne, xebatê restorasyonî ameyî destpêkerdene. Ame zanayene ke xeylê karkerî kewtê Sûr û verê restorasyonêî pakitî kenê û kerrayî Sûran ra ameyî vetene. Karkerê xebata pakitî zî dîyar kerdî ke bi talîmatê şaredarî dir do xebata înan hîrê mengan dewam bikera û sewbîna ame îdiakerdene ke Wezaretê Kultur û Turîzmî do uca zî turîzmê rê abikero. Îdiayo bîn zî oyo ke do Sûrê Amedî Îhale rê bêrê akerdene û netîceyê îhaleyî bidê kargehê xerîban.

 

‘Ercanê ma danê xerîban’ 

 

Welatîyê Amedî vera nê reaksîyon ramojnenê. Suna Aslane dîyar kerd ke çinkerdişê wareyê tarîxî yenê manaya pakkerdişê wişk û vat: “Wazenê ma tarîxê xo, xo vîr ra bikerê. Wexto ke ma tîya vînenê, vîyarteyê ma yeno vîrê ma. Eke tîya çin bibo, do vîyarteyê ma zî çin bo. Ma do domananê xo rê senî vajê Îhaleyan akenê û ercê şarê Amedî danê xerîban. Ma nê qetî qebûl nêkenê. Çi destê ma ra bêro ma do bikerê.”

 

‘Dewlete do tîya zî xira bikera’

 

Welatîyêk/e nêwaşt nameyê xo bido/a zî reaksîyon ramojna û vat, “La şarî rê çi verdayî. Ma wazenê Amed wina bimano. Ma nêwazenê ê destê xo bidê tîya. Ma xo dî, nêdî Sûrî bî. Ma hemverê çinlerdişî yê. Her ca açernayî rant. Ma bêveng nêmanenê. Wa dest nêdê tarîxê ma.”