Fîlîz Zeyrek

 

EDENE - Ayşe Hîlal Durmaze, camêrdo bi nameyê Taner Taşkirino ke serê telefon û medyaya komelî de aye û embazanê aye tacîz kerdib, bi embazanê xo dir teşhîr kerd û dîyar kerd ke ganî gumanbar vejîyo verê hukmî.

 

Ayşe Hîlal Durmaza ke wendekara sinifa 3yîn beşê Komelnasî û hîrê embazanê aye keyeyî bî, bi mengan hetê camêrdo bi nameyê Taner Taşkirinî ra serê telefon û medyaya komelî ra ameyî tehdîdkerdene û tacîzkerdene. Ayşe û embazê aye, camêrdo gumanbar Taner Taşkiranî. teşhîr kerdî û dayî zanayîş ke gumanbar serê nameyê cinîyan de bi seyan hesabê sexteyî akerdê û derûdorê înan ra pere waşto.

 

‘Hizûrê mi nêmend’

 

Ayşe dîyar kerd ke Taner Taşkiranî cinîyan rê tehdîd kerdo û ganî bêro muhakemekerdene û wina vat: “Seba na hedîse, hizûrê mi nêmend. No kes bi sebebê embaza min a keyeyî, verê xo da mi û qet nas nêkena. Vernê de mesaj eşt. Ma ey çara asteng kerd xo resna ma. La no kes hîna har bi û bêmabên serê nameyê mi de hesabê sexte akerd û xo resna derûdorê mi. Derheqê mi de îdia eşt werte. Seba ke mabêne min û embazanê mi, keyeyê mi xira bikero her çî kerd. Kesê ke mi nas nêkenê, derheqê mi de bî wayîrê şîroveyê cîya. No mi zaf xemgîn keno.”

 

‘Bi taybetî cinî hedefê ey de yê’

 

Ayşe dîyar kerd ke do demêko nêzdî de şêro dozgerî û gerre bikero û wina vat: “No kes her wext vano ke ez pawitoxê dozgerî ya yan zî vano ez polîs a. Vano ke kes nêeşkeno mi rê çîyêk bikero. Vano ke ez key biwazî, ez eşkena xo biresnî şima û şima rê heyat bikerî zindan. Bi no karî pere qezenc keno. Pêro zanayîşê cinîyan gêno û vera nê bi pere tehdîd keno. Ma zanê ke xeylê kesan ra pere gêno. Taybetî zî cinî hedefê ey de yê. No şîdet o. Hizûrê ma nêmend.”

 

Ayşe tewr peyîn veng da cinîyan û vat: “Wa no kes bêro teşhîrkerdene û tewr girîng zî wa no kes bêro vînayene û vejîyo vera hukmî. Ez wazena cezaya xo bianco.”