EDENE - Hepsîyê ke zîndanê Cinîyan ê Tarsusî de dîyar kerdî ke seba koxuşê 11 kesî werdê 3 kesî yeno dayene û vengdayîşê hîsgêrî kerd.

 

Hepsîyê Zîndanê Cinîyan ê Tarsusî ke her wext îhlalê heqan dir yeno rojeve, bi pêvînayîşê telefonî yê bi keyeyanê xo dir îhlalkerdişê heqan yê hemverê înan neql kerdî. Hepsîyan dîyar kerd ke îdarekarê zîndanî seba koxuşê ke 11 kesî ci de manenê, werdo ke qîmê 3 kesan keno yeno dayene. Sewbîna hepsîyan dîyar kerd ke pêvînayîşê bi telefonî yê hewteyî yenê kerdene zî bi hawayêko kêfî ameyo vurnayene.

 

‘Wazenê pêvînayîşê telefonan asteng bikerê’

 

Merdima hepsîyêk ke nêwaşt nameyê xo bido wina vat: “Verê pêvînayîşê telefonî eynî saete de ameyne kerdene. Qet nêbê ma vengê yewbînan eşnawitêne. Ma rehet bîne. Nika geyrayîşê telefonî dîyar nîyo. Xeylê reyan wayê û birayê yewbînan nêeşkenê pîya qisey bikerê. Xora pêvînayîşê akerde û girewte zî wina zêde nînokerdene. Tena telefonî de ma vengê yewbînan eşnawenê. Goreyê vatişê înan, înan rojêk reaksîyon ramojnayî û sere wedaritê. Yanî eke no helwestê înan nêbîne, pêvînayîşê telefonî zî nêameyîne kerdene.”

 

Merdima hepsî dîyar kerd ke koxuşêke de 11 hepsî manenê û tena werdê bi qaso ke 3 kesî bieşkê biwerê yeno dayene û vat: “Zîndanan de îhlalkerdişê heqan nêqedêno. Werd nîno dayene. Werdo ke yeno dayene zî nîno werdene. Wazenê ke kantînan ra çîyêk bigirê. Seba pandemî qedexe yo. Hepsîyê ke reaksîyon ramojnenê zî vatişê gardiyanan yê, ‘geber bê’ yenê. Koxuşî xora baş nîyê. Ma heme zanê. Nika zî problemê werdî ciwîyenê. Ma vengê domananê xo bidê eşnawitiş. Ma do vera nê bêhuqûqî mucadele bikerê.”