Lîlav Elî 

 

ŞEHBA - Cinîya bi nameyê Esmehan Ebdoya 46 serrî ke Herêma Efrînî ra ya û xo rê aşxane akerda, derheqê xebate xo de wina vat: "Verê şorişê Rojawanî karkerdişê cinîyan ê teberî şermb bi. Bazar de mi aşxaneyêko qij xo rê akerd û ekonomîya xo xurt kena.” 

 

Wareyê ekonomî ke yew ci ra cinî tewr zêde xebitênê yo. Cinîyê rojawanê Kurdistanî bi destpêkerdişê şorişê dir cayê xo wareyê ekonomî bazar de zî girewtî. Netîce de xeylê proje zî seba cinîyan ameyî kerdene. Cinîya bi nameyê Esmehan Ebdoya 46 serrî, dayîka 4 domanan a û dewa Maratî ya Herêma Efrînî ra ya. Esmehane seba ke debara keyeyê xo bikero û bibo ekonomîyêka xoser, Şehba de zî aşxaneyêk akerdo û ci de xebitêna. Derheqê projeyê aşxaneyê Esmehan de fikrê xo ard ziwan. 

 

‘Eke ma nêxebityê ciwîyayîş zaf zehmet o’

 

Esmehane destpêkê qiseykerdişê xo de serê projeyê xo yê aşxanî de qalî kerd û vat: “Semedo ke Kantonê Şehbayî de verê çend serran şer qewimyabi, rewşa ciwîyayîşî tîya de zaf xidar bi. Tu kesî bawer nêkerdêne ke ciwîyayîş tîya bêro qedênayîş. La seba îradeyê ma seba ciwîyayîş xurt bi, ma newe ra xeylê awankerdiş, xo dir viraşt. Mi waşt ke bi akerdişê aşxanî dir ekonomîyêka xurt û xoser awan bikerî. Eke ma nêxebityê, ciwîyayîş zaf zehmet o." 

 

‘Bi karê xo ez kêfweş bena’

 

Esmehane dîyar kerd ke verê şorişê Rojawanê Kurdistanî îmkanê înam teber de katkerdiş zor bi û wina vat: “Verê Şorişê Rojawanê Kurdistanî de cinî hîn wareyê ciwîyayîşî ra bêpar mendibî. Wareyê ekonomî zî zaf girîng o seba dewamkerdişê ciwîyayîşê merdimî. Sewbîna îmkanê karkerdişê teberî zehmet bi. Mi zî bi îmkananê kêmî xo rê cayêko aşxane akerd. Wexto ke mektebî akerdebê aşxaneyê mi de berardişî zaf estê, seba ke her kes yeno werd weno. Aşxane de ez sendewîçê felafil, goşt û hakan roşena. Bi karê xo ez kêfweş bena.”