DÊRSIM - Bîrgul Varlier û Sedef Kayaoglu yê Pilûrijî bi pesdawarî û ramitiş dir eleqedar benê û xeylê baxçe û heywananê xo hes kenê. Bîrgula ke wexto ke wazena boya xo bida, şina qeraxê Munzurî û wina vana: "Tîya her ca ê to yo û ti azad a." Cinîyê ke bi xoza dir ciwîyenê, heywananê xo û bostananê xo hes kenê û kede danê.

 

Bi ameyîşê hamnanî dir Dêrsim de sebze û fêkîyê ke bostanan de ameybî ramitiş, yenê komkerdene. Bostanê ke bi fêkî û sebzeyê cîya xemilîyayê, tewr zêde cinî xebityenê. Eynî wextî de cinîyê ke bi ramitişî dir û pesdewarî dir debara xo kenê, bi heskerdişêko pîl bostan û heywananê xo rê ewnîyenê û heywananê xo ewnîyenê û wayîr vejênê.

 

'Xeylê karê ke bêrê kerdene estê'

 

Bîrgul Varliera ke dewa Guneykonakî ya Pilûrî de ciwîyena wina dîyar kerd: “Ez serê sibayî saete 5 de wirzena. Vernê de şina axûr ewnîyena heywanan ra, axûr pak kena. Heywanan ancena. Şitê xo bena keye kena mast, penîr. Karê mi zehmet bo zî ez karê xo ra hes kena. Pêwa nînan, ez bi karê keyeyî dir zî eleqedar bena. Ez ewnîyena vistewreya xo ra. Xeylê karê mi esto."

 

'Munzur de merdimî azad ê'

 

Bîrgule dewam de wina vat: "Hewayê na xoza, hizûr dana merdiman. Ez seba boyedayîşî şina Munzur. Tîya her ca ê to yo, ti azad a. Têkilîyê mi heywananê mi dir cîya yo. Ê mi ra hes kenê, ez zî înan ra. Ez sebze û fêkî ramnena. Semedê vîrusî emsar zêde qezencê ma çinbi."

 

'Ma ramitişê bostanî goreyê mewsîmî kenê'

 

Sedef Kayaogluya ke taxa 94 Pilûrî de bostan ramito, vana ke problemê awe ciwîyenê û vat: "Ramitişê bostanî goreyê mewsîmî yeno kerdene. Emsar hamnan lez ame. Xişke vara û berardişê ma zirarêko pîl dî. Ma hewteyê ewil yê hezîrane de dest bi ramitiş kerd. Nika berardişê ma resayê. Ez zaf baxçeyê xo ra hes kena. Ez wexto ke yena baxçe nêwazena şêrî keye. Ez xo bi hîzûr hîs kena. Ez sebzeyê xo konserve, awa firingîyan viraznena. Sebze wişk kena."