AMED - Muracatê semedê perwerdeyê Akademîya Ma Muzîkî ke beşê Dengbêjî û Domanan zî mîyan de ca gênê, dest pêkerdê. Mamosteya pîyano ya Ma Muzîkî Sarya Ertaşe dîyar kerd ke aye dersê xo çarçewaya tedbîrê koronayî de zî dewam kerdê.

 

Akademîya Ma Muzîkî ke Amedî dimayê Konservatuarê Aram Tîgranî ya bi sloganê, "seba her kesî muzik, her ca de muzîk" dest bi xebatê xo kerd, wayîrê taybetmendîya ke perwerdeyê muzîkî bi ziwanê kurdî dana ya. Ma Muzîk ke her serre xebatê xo bi hawayêko baş dewam keno, emsar zî rewşa pandemî de xebatê xo yê komî dayê vindarnayene. Seba ke dersê xo bi rayîrê online dewam kerdêne. Nika zî reyna xebatanê xo dewma keno û muracatê seba perwerdeyê Akademîya Ma Muzîkî yê seba beşê Dengbêjî û perwerdeyê mûzîkî yê seba domanan ameyî destpêkerdene. Muracatê ke 15ê Tebaxe de ameyê destpêkerdene do heta 15ê teşrîna verêne dewam bikero. Mamosteya pîyano ya Ma Muzîkî Sarya Ertaşî derheqê xebat û muracatê akademî de qisey kerde.

 

'Ma dersê xo dewam kerd'

 

Sarya derheqê akademî de wina vat: "Konserê ma yê seba domanan, yê pîlan û yê ke tena bi embazanê cinî yenê kerdene estê. La dimayê rewşa pandemî ma heme xebatê xo yê komî heta nêzdîyê 4 mengan dabi vindarnayene. Nika zî yew bi yew ma dersê xo goreyê tedbîrê korona kenê. Gama ke Akademîya Ma ma padabi, ma dersê xo bi rayîrê online kerd. La ma do êdî dersê xo yê rî bi rî dewam bikerê û ma do bi online zî dewam bikerê."

 

'Muracatê Akademî 15 Teşrîna Verêne de peynî benê'

 

Sarya dîyar kerd ke muracatê akademî 15ê teşrîna verêne peynî benê û wina vat: "Akademîya domanan seba wendekarê 7 serrî heta 14 serrî yê. Akademîya pîlan zî seba kesê 17 serrî heta 30 serrî yê. Akademîya Dengbejî zî seba kesê emrê înan mabêne 17 serrî û 35 serrî yê û seba domanan zî 10 serrî heta 16 serrî perwerde yeno dayene. Dimayê muracatê îmtîhan yenê kerdene û kesê ke îmtîhan derbaz bikerê perwerdeyê înan yeno destpêkerdene."

 

'Seba muracatî eleqe zêde yo'  

 

Sarya dîyar kerd ke seba eleqeyêko pîl esto û vat: "Nika waştiş seba heme beşê akademî esto. La tewr zêde seba beşê dengbêjî eleqe zêde yo. Sewbîna beşê domanan zî eleqeyêko pîl vîneno. La seba beşê bînan zî eleqe kêm nîyê û zêde yê."