AMED - Nezahat Kaçara ke semedê debara xo bikera, bi karê dekorasyonî dir meşgûl bena û wina vat: “Her cinî eşkena bi îmkananê xo yê bîyaye micadele bikera û serê linganê xo de vindera. Semedê nê zî xobawerî û kede lazim a.”

 

Micadele, bîyo sey xercê bîyayîşê cinîyan ke pêwa heme zehmetîyan serê linganê xo de vindenê. Yew nînan ra Nezahat Kaçara 37 serrî ya. Nezahata ke balkona keyeyê xo de bi boyax form dana kerreyan, dekorê tewir bi tewir awan kena. Nezahate hem hûnerê xo kena û hem zî debara xo kena û bi hunerê xo hîsanê xo ana ziwan.

 

Nezahate dîyar kerd ke aye kewta binê tesîrê kerreyan û vat: Cuya mi kir her wext bi micadele derbaz bî. La hunero ke ez nika kena hêz dano mi. Ez verî Stenbol de bîya û karê tewir bi tewir de xebityaya. La dimayê qanserê cicikan ez mecbûr menda ke fek xebate ra vera bidî. Dimayê ke tedawîya mi Stenbol de qedîya ez keyeyê xo dir ameya Amed. Mi Amed de xo rê cuyêka amede kerd. Dimayê ke mi û mêrdeyê xo ma frk yewbînan ra vera da, ez û di domanê xo tena mendî. Semedê nê ez kewta lebata karî. Çend kargehan de ez xebityaya la dimayê ke pandemî dest pêkerd ez reyna bêkar menda. Prosesê pandemî de mi kerreyan kifş kerd.”

 

‘Mi hesretê xo serê kerreyan de resim kerd’

 

Nezahate dewam de wina vat: “Ez behrî ra zaf hes kena û vîrî kena. Semedo ke ez vîrîya behrî kena, ez serrê kerreyan de zî maseyan xêz kena. Dima ra zî mi dekorêko bîn da hacetê keyeyê xo ke mi nêxebitnayîne û mi înan ra hacetê tewir bi tewir viraştî. Destpêk de mi nê karî sey hobî kerdêne. La bi wextî dir xebatê mi eleqeyêko pîl dî. Dimayê nê eleqeyî, hacetê ke mi viraştî mi înan rotî û seba mi bî çimeyê debare. Nika zî xeylê xo serê text û kerreyan de xebityena.”

 

‘Îmkanî qîm nêkenê’ 

 

Nezahate tewr peyîn wina vat: “Her çiqas karê mi weş bo zî çi heyf bingeyê ci çin o. Yan zî do dem de virazyo, dîyar nîyo. Karêko winasî tena serê sîparîşan de yeno kerdene. Di domanê mi estê û ez înan ra berpirsîyar a. Waştişê min o tewr pîl seba înan cuyêka baş a. Nika ez xebatanê xo balkona keyeyî de kena. La eke atolyeyêke mi bibayîne, beno ke mi hunerê xo hîna aver berdêne. Ez wazena tewirê hunerê xo zêde bikerî, la reyan îmkanî qîm nêkenê. Sewbîna keda seba hunerî hetê merdiman nîna vînayene. Pêro xebatanê mi de keda destê mi esta û wextê xo dana. Huner verê çimanê însanan de asan û qij yeno vînayene.”