AMED - Ame dîyarkerdene ke Zîndanê Bedlîsî de testê semedê vîrusê koronayî yê 15 hepsîyan pozîtîf vejîyayo û keyeyê hepsî bi nameyê Îslam Yaşaro ke eynî zîndanî de maneno, dîyar kerd ke ê bi rewşa hepsîyan bi endîşe yê û wazenê ke ganî tedbîr bêrê girewtene.

 

Roja ke (COVÎD-19) welat de peyda bi, babetê ke ameyne munaqeşekerdene, yew înan ra asayîşê hepsîyan bi. Hepsîyê ke şert û mercê zîndanî de nêameyî pawitene, sere de keyeyê înan û xeylê sazgehan reaksîyon ramojnayî. Îqtîdar seba weşîye tu tedbîr nêgirewt û hepsî ameyî tecrîdkerdene.

 

Nêweş û ê ke nêweş nîyê eynî cay de yenê tepiştene

 

Seba asayîş nêame girewtene, hepsî bi vîrus kewtî. Tewr peyîn parlamentera Partîya Demokratîke ya Şaran (HDP) ya Sêrtî Meral Daniş Beştaşe persname dabî meclîs û vatibî ke Zîndanê Tîpê E yê Bedlîsî hepsî bi vîrus kewtê. Ame neqlkerdene ke Zîndanê Bedlîsî 15 hepsî bi vîrus kewtê û îdarekarê zîndanî zî hepsîyê ke bi vîrus kewtê û ê ke nêkewtê eynî ca de hêno.

 

‘Tîya zîndan o cayêko taybet nîyo’

 

Birayê hepsîyê sîyasî yê bi nameyê Îslam Yaşaro ke zîndanê Bedlîsî de qawîşa 3-C de maneno Abîdîn Yaşarî dîyar kerd ke îdarekarê zîndanî zî vîruso ke zîndan de vila beno tesdîq kerd û Abidînî wina vat: “Sere de vatî 25 kes ê û dima ra vatî testê 15 kesî pozîtîf vejîyayo. Nê pêro hepsîyê sîyasî yê û ê ke bi vîrus ê û vîrus nîyê eynî ca de yenê tepiştene. Mi bi mudurê zîndanî dir pêvînayîş kerd û ey zî dîyar kerd bi vîrus estê la çîyêko girîng çin o. Verê nê de zî vat, ê heme hepsîyan têhet de verdenê û mi zî vat, şima kesê ke bi vîrus ê û vîrus nîyê senîn têhet de verdenê? La ey zî mi ra vat, ‘Tîya zîndan o, cayêko taybet nîyo’ û qiseykerdişê mi birna.”

 

‘Di hepsîyê rewşa înan giran neqlê nêweşxane kerdê’

 

Abîdînî dîyar ke dimayê zanayîşî di hepsî neqlê nêweşxane kerdê û wina vat: “Semedo ke bi hepsîyan dir pêvînayîş bikerê, ma avûkatan erşawit. Avûkatan dîyar kerdî ke înan rê neql kerdê eke siba testê hepsîyan negatîf vejîyo do destûr bidê ke pêvînayîş bêro kerdene. La ma bi endîşe yê û ma nêzanê ke ça do se bikerê. Goreyê zanayîşê ke ma girewtî 2 hepsîyê ke rewşa înan giran a, wedarnayê nêweşxane. Nînan ra yew zî 55 serre yo. Gelo hepsî gan nîyê? Qawîşa ke birayê mi ci de yo, tewr tay 10 kesî eynî ca de yê. Roja îne ganî ma ey dir pêvînayîş bikerdêne, la destûr nêdayî. Coka ma rewşa hepsîyan ra bi gûman ê.”