WAN - Aktîvîsta TJAyî Dîlan Yildize bale ante serê şîdetê hemverê cinîyan ke mîyanê keyeyî de yeno kerdene û vat: “Wan de şîdetê hemverê cinîyan her roja ke şino zêde beno. Şîdeto ke keye de yeno kerdene, sey problemê keyeyî yeno ercnayene û şîdetê hemverê cinîyan yeno nimtene. Tîya de zî cinî ney keye yeno pawitene.”

 

Munaqeşê derheqê betalkerdişê Pêameyîşê Stenbolî dewam keno. Her ca de semedê nê reaksîyon yeno ramojnayene. Cinîyê ke protesto kenê, hêrişê polîsan dir rîbirî manenê, yenê destbendkerdene û tepiştene. Sewbîna munaqeşeyê hemverê Pêameyîşê Stenbolî de kiştiş û şîdetê hemverê cinîyan deeam keno. Aktîvîsta Tevgerê Cinîyê Azadî (TJA) Dîlan Yildize derheqê babete qisey kerd.

 

Dîlane sere de bale ante serê xebatê ke Wan de yenê kerdene û vat: "Şîdetê hemverê cinîyan her roja ke şino zêde beno. Hûmara cinîyê ke wazenê dewa veradayîşî akerê, yenê kiştene. Cinîyê ke xo resnenê ma hetkarî wazenê. Wan de şîdetê mîyanê keyeyî de her roja ke şino hîna zêde beno. Wexto ke cinî muracatê ma kenê, ma wazenê şêrê serdayîşê înan. Labelê ma bi reaksîyonê keye û mêrdeyî dir rîbirî manenê. Nêwazenê kesê xerîban tewrê meselaya xo bikerê. Tîya cinî ney, keye yeno pawitene.”

 

‘Ma do dewaya Fîlîze taqîb bikerê’

 

Dîlane dîyar kerd ke Fîlîz Karagulle waştêne dewaya veradayîşî abikera la mergî dir rîbirî mende. Dîlane wina qalê Fîlîze kerd: “Ma dewaya Fîlîze nêzdî ra taqîb kenê. Fîlîze bi her tewir şîdetî dir rîbirî menda. Tewr peyîn bi hewldayîşê xo mergî ra xelas bîya. Labelê Fîlîz tena ney, bi hezaran cinî mîyanê rewşêka winasî de yê. Zîhnîyetê mêrdeyî tena seba keye vila nêbo kewt mîyanê hewldayîşî. Labelê ma do her wext verê Fîlîze de bê û ma do taqîbkerdoxê dewa bê.”

 

‘Paştdayîş danê TJA’

 

Dîlane tewr peyîn wina vat: “Xeylê embazî ma ameyî destbendkerdene. Wexto ke merdim ewnîyeno dosyayê înan ra, vîneno ke hetkarkerdişê cinîyêk bîyo sûc. Nimûneyê tewr balkêş zî embazê ma seba ke beşdarê çalakîyê 25ê teşrîna peyêne Roja Têkoşînê Vera Şîdetê Hemverê Cinîyan û 8ê Adare rê bîyê, ameyê tepiştene. Labelê cinî zaf teda û zordarî vînenê la reyna zî wayîrê TJAyî vejênê. Cinî do rayrayîşê xo pîya dewam bikerê.”