Cinî hemverê şîdetî de xo pawenê 

2024-12-09 11:58:32


	 

	 

	AMED - Amed de çarçewaya kampanyaya “Vatişê ma nêqedîya. Ma do pîya şîdet vindarnê” de “Atolyeya Xopawitişî” amebî destpêkerdiş û atolye de cinî yenê perwerdekerdiş ke bieşkê xo şîdetî rê bipawê. 

	 

	"Atolyeya Xopawitişî " ke Şaredarîya Bajarê Pîlî ya Amedî, hemverê şîdetê cinîyan ser daya destpêkerdiş, dewam kena. Çalakî û aktîvîteyê ke hetê Serekîya Daîreyê Xizmetê Cinî û Keyeyî ra çarçewaya kampanyaya "Vatişê ma nêqedîya, ma do pîya şîdet vindernê" ke bi wesîleya 25ê Teşrîna Peyêne Roja Têkoşînê Hemverê Şîdetî yê Cinî ameyo destpêkerdiş, dewam kenê.

	 

	"Atolyeya Xopawitişî” ya Merkezî Cuya Cinî ya Parkê Koşuyolu ya qezaya Baglarî ame organîzekerdiş, yew xebata ke na çarçewa de ameya destpêkerdiş. Atolyeya ke hetê cinîyanê Amedî ra bi taybetî cinîyanê Şaredarîya Bajarê Pîlî de şuxilênê eleqeyêk pîl vînena.

	  

	Antrenora Atolyeya Xopawitişî Evîn Turan wina vat: “Ma dersê pîlatesî dayîne. Semedo ke hedîseyêk ameye sereyê mi eleqeyê min ê xopawitişî nêzdî ra zêde bî. Rojêke wexto ke ez şîne keye derûdorê saetê 8-9ê şewe de hetê di ciwanan ra rastê tacizê fekî ameya. Badê ke mi bi telefon qisey kerd, telefonê mi peyser antî û remayî, kardî vetî û mi tehdîd kerdî. Nê semedî ra mi dest bi perwerdeyê xopawitişî kerd. Badê perwerdeyî ez bîya antrenor. Mi dersê xopawitişî yê nêzdî da tutan û cinîyan."

	  

	Evîn Turan, dîyar kerd ke cinî badê ameyê dersan, xeylêk wareyan de eşkayê xo bipawê. Evîn Turan vat ke qezaya Rezanî de xeylêk cinîyê dezavantajî est ê û dîyar kerd ke Merkezê Cinîyan ê Parkê Koşuyolu yê Şaredarîya Bajarê Pîlî de xeylêk qurs bêpere yenê dayîş. 

	  

	Dewamê nê de Evîn Turane dîyar kerd ke serê sibayî saete 09.00ine de dest bi derse kenê û dîyar kerdî ke rojane perwerdeyî danê 35-40 cinîyan.

	 

	Perwerdekaran ra Sema Ayhan zî wina vat: “Ma xeylêk reyan teber de rastê şîdetî yenê. Nê semedî ra ez fikrîyena ke ganî her cinî xo bipawê. Bi vînayîşî mi ganî her cinî bêro qursê winasî. Ma semedê xo başêr bipawê yenê tîya. No ca xeylêk çîyan ma rê zêde keno. Vernîya ke ma bêrê atolye bi rastî zî ma nêzanayîne ma xo senî bipawê. Eke kesêk hêrişê ma bikero, ma o wext nêeşkenê xo bipawê. La badê ke ma ameyî tîya, ma musayî xopawitiş. Ez vanê qey ma nika resayê sewîyeya ke ma êdî baş eşkenê xo bipawê.”