‘Heta ke netîce bêro girewtiş ma do meydanan de bê’

2024-12-05 10:30:51


	 

	Memihan Zeydan

	 

	WAN - Şaro ke tayînkerdişê qeyûmî yê semedê şaredarîya Mîksî qebûl nêkeno, verê barîkatanê polîsan yê verê şaredarî de çalakîya nobete dayî destpêkerdiş. Cinîyan reaksîyon vera qeyûman mojnayî û vatî: “Heta talanê qeyûman nêqedîyo, do têkoşînê ma dewam bikero. Tu hetê huqûqî yê qeyûman çin o. No bêtehemulîyê hemverê girewtişê 14 şaredarîyan o.”

	 

	Îqtîdarê AKP-MHP ke 2016ine ra polîtîkayê qeyûmî dewam keno, demê hîrêne de tayînkerdişê qeyûman dewam keno. Tewr peyîn qeyûm tayînê şaredarîya Colemêrg, Esenyurtê Stenbolî, Êlih, Xelfetîyê Rihayî, Mêrdîn, Dêrsim û Mîksî rê ame kerdiş. 29ê teşrîna peyêne de qeyûm tayînê şaredarîya Mîksî bi û badê nê şar dest bi xoverdayîşî kerd.

	 

	Cinîyê ke çalakîya nobete de bî ajansê ma rê qisey kerdî.

	 

	‘Eke hemşaredar nêbîne do berat bikerdêne’

	 

	Hemşaredara Rêya Armûşî Canan Uzunay reaksîyon vera qeyûmî mojna û vat: “Bi rojan o ma çalakîya nobete dewam kenê. Îqtîdar hîrê demî yo, qeyûman tayîn keno. hemşaredar Ayvaz Hazir semedê  dosyayêke de ceza girewto, qeyûm tayîn kerdî. No bahane yo. Na dosya, dosyayêke ceza girewtişî nêbî.  Hevalê ma o wext xebatkarê şaredarîye bî. Beşê çapemenîye de bî. Tena semedê antişê fotografêk ceza ci rê dayî. Ewro hemşaredar nêbîne, do berat bikerdêne. La heta ke netîce bêro girewtiş, ma do meydanan de bê."

	 

	‘Ma rayîr nêdanê qeyûman’

	 

	Hemşaredara Tatosî ya Erziromî Gulen Şengul zî vat, ganî şar wayîrê îradeyê xo vejîyo û tu hetê huqûqî yê qeyûman çin o û Gulen Şengul dewam de wina vat: “Ma îmkan nêdanê qeyûmê ke tayînê îradeyê şarî bîyê. Ma nê tayînkerdişan qebûl nêkenê. Ma do heta peynî têkoşînê xo dewam bikerê.”

	 

	‘Wa barîyer û qeyûmê ke tayîn kerdê peyser biancê’

	 

	Endama meclîsê şaredarîya Bêgirî Emîne Yarvaç zî dîyar kerd ke hîrê rojî yo verê hewayê serdî de xo ver danê û vat: “No nîno qebûlkerdiş. No zilm o. Ma hemverê nê xo ver danê. Şarê Mîksî xeylêk birumet o. Nê zilmî qebûl nêkenê. Ma zî nêwazenê. Wa nê barîyer û qeyûmê tayîn kerdê, peyser biancê. Ma do xoverdayîş dewam bikerê.”

	 

	Hemşaredara Elbaqî Şengul Polat zî wina vat: “Şarê kurdî babeta wayîrvejîyayîşê îradeyî de helwestêk zelal mojna. Îqtîdarî tehemulê girewtişê 14 şaredarîyan nêkerd. Coka qeyûman tayîn kenê. Ma tîya yê. Na nobete do dewam bikero. Heta roja ke no talan peynî nêbo, do têkoşîn dewam bikero. Ma kîşte şarê Mîksî de yê û ma do timî kîşte înan de bê.”