Dayîkê Aştîye: Peynîya pêrodayîş û şerî bîyarê 

2024-12-09 11:12:06


	 

	STENBOL - Înîsîyatîfê Dayîkê Aştiye ya Stenbol reaksîyon vera hêrîşê hemverê Vakur û Rojhelatê Sûrîye mojnayî û vatî: “Semedî şer û pêrodayîşî ganî şer peynî bîyarê, ganî her kes dorê têkoşînî de bêro têhet.”

	 

	Hêrişê Tirkîya yê hemverê Vakur û Rojhelatê Sûrîye 27ê teşrîna peyêna ra dewam keno. Înîsîyatîfê Dayîkê Aştîye ke bi serran o wareyan de venga aştîye kenê, dîyar kerdî ke ganî lezkî hêrişê hemverê Vakur û Rojhelatê Sûrîye peynî bibê.

	 

	‘Rojawan paytextê Kurdistanî yo’

	 

	Dayîka Aştîye Rewşan Guler wina vat: “Ganî semedê venga seferberî pêro şarê Rojhelatê Mîyanên vengê xo vejê. Heyet Tahrir el-Şam (HTŞ), çeteyê DAIŞî cîyayêr nîyo. Dinya de çiqas çeteyê lêşînî est ê bi destê Tirkîya wayîr bîyî, pîl bîyî û semedê şer amade bîyî.Nê çeteyî semedê şarê kurdî ameyî resnayîş. Ewro hêrişê Rojawanî kenê û do siba hêrişê tîya bikerê. Nê çeteyî lêşînî do pêro dinya de vila bibê. Do her cayî de qirkerdişan bikerê. Ganî ma paştdayîşê xo semedê Rojawanî bikerê. Rojawan paytextê Kurdistanî yo. Kobanê semedê Tayîp Erdogan bîyo derd. Ez a bawerî de ya ke do têkoşînê şarî kurdî serkewte bibo.”

	 

	‘Ma do ser bikewê û bi dest bikerê’

	 

	Revşan Guler wina qedêna: “Rayîro ke şino serkewtiş yewîye yo. Ganî her kesê aştî û demokrasî wazenê hemverê şerî de bibê. Şarê kurdî 50 serrî yo têkoşîn keno û peyser game nêerzeno. Ma azadîye wazenê. Ma fek waştişê xo ra vera nêdanê. Ma do ser bikewê û bidest bikerê.”

	 

	‘Wazenê kurdan qir bikerê’

	 

	Dayîka Aştiyê Reyhan Akgul zî wina vat: “Hêrişê Tirkîya yê hemverê şarê kurdî de hemverê ehlaqî yo.  Tirkîya bi serran a tutanê ma tepişnena, dewanê ma veşnena. Herra ma dana adirî ver. Çeteyê fuhuşî û hişbirî kuçe de gêrenê, vengê xo nêkena. Wexto ke babeta bena kurdî qirkerdişî ra veng nêkenê. Kurdî nêqedênê. Ma tutê xo bi zor û zehmetî pîl kerd. Ma polîtîkayê şerî qebûl nêkenê. Kurdî bi serran o nêqedîyayê û tîya ra tepîya zî do nêqedê. Têkoşîn bi serran o dewam keno û tîya ra tepîya zî dewam keno.”

	 

	‘Wa destanê xo kurdan ser o biancê’

	 

	Reyhan Akgul tewr peyîn wina vat: “Netîceya şerî de bi hezaran merdimî koçber benê. Wa fek nê zilmî ra vera bidê. Wa destê xo kurdan ser o biancê. Wa bêrê kurdan dir muzakere bikerê û peynîya nê qirkerdişî bîyarê. Wa veng bidê Dayîkê Aştîye, destê aştîye derg bikerê.”