Ferîde Zada

 

ŞEHBA - Çalakîyê ciwanê ke seba ageryayîşê Efrînî organîze kenê bi sloganê "Seba Efrînî sere wedarnê" dewam kenê. Ciwanê ke beşdarê çalakîyan benê ewnîyayîşê xo ardî ziwan.

 

Ciwanê Efrînî ke Kantonê şehbayî de bi ca bîyê, her roj seba xelisnayîşê Efrînê bi sloganê "Seba Efrînî sere wedarnê" mîyanê çalakîyan de yê. Ciwanê ke beşdarê meş û çalakîyê tewir bi tewir ke seba ageryayîşê Efrînî benê ewnîyayîşê xo bi ajansê ma dir pare kerdî.

 

Kênaya Şehîd Berxwedanî, Emîne Bakire dîyar kerde ke aye serê rêçe pîyê xo û temamê pakrewanê azadî beşdarê çalakîyan bena û wina va: "Bi nêzdîbîyayîşê 20ê çele dir sergerra yewin ê hêrişê serê Efrînî, ma sozê xo bi şehîdan dir newe kenê ke ma do heta peynî serê rayîrê têkoşînê azadî bimeşnê. Ganî temamê şarê azadîwaştoxî dinya de sere wedarnê û heyfê şehîdê xoverdayîşan wedarnê."

 

'Xoverdayîşê Şehba dewam keno'

 

Fatima Mihemede zî sergerra yewin hêrişê dewleta  tirk û çeteyê OSOyî serê Efrînî şermezar kerde û va: "Xoverdayîşê 58 rojan ê hemverê hêzê diyîn ê NATO de, ewro Kantonê Şehbayî de dewam keno. Ez xoverdayîşê serdemî selam kena, bi îmkanê qij û hêzo pîl ma do Efrîn xelas bikerê."

 

'Heta Efrîn bêro xelisnayîş ma do serê lingan de bê'

 

Heto bîn ra bi nameyê Meryem Bîlale zî arde ziwan ke serê felsefeyê Rayberê PKKî Abdullah Ocalanî de ê têkoşînê xo dewam kenê û wina va: "Seba qirkerdişê ke ma Efrîn ra vejîyayî û Şehba de bi ca bî. Ma nika Şehba de çalakîyê xo dewam kenê û heta xelisnayîşê Efrînî ma do serê lingan de bê."

 

'Bi îşgalkerdiş nêeşkenê hêzê ma bişiknê'

 

Lorîn Osmana ke hîsê xo arde ziwan dîyar kerde ke bi nêzdîbîyayîşê 20ê çele ra çalakîyê xo tewr zêde kerdê û wina dewam kerde: "Do hêriş û îşgalkerdiş hêzê ma yê ciwanê Efrînî nêşikno. Bawerîya ma bi fikrê azad û cuyake têduşt yena, heta Efrîn xelas bibo ma do mîyanê çalakî de bê."

 

'Xoverdayîşê ma bê peynî yo'

 

Zîlan Sîdoye zî dîyar kerde ke pêwa hêrêşê giran, şert û mercê zehmetê înan reyna wendegehê xo Şehbayî akerdê û wina va: "Heta peynî vera îşgalkerdişî ma do sere wedarnê. Ciwanê kurd û ereb û temamê netewê Efrîn do seba azadîya Efrînî her çî bikerê. Xoverdayîşê ma bêpeynî yo."