ENQERE - Sîyasetmedarê HDPî ke seba çalakîya grevê vêşanî ê Leyla Guvene veng dayî, dîyar kerdî ke tecrîd tena problemê şarê Kurdan ya zî  HDPyî nîyo û vatî ganî platformê cinîyan, kesê şorişgêr û sîyasetmedar heme vera tecrîdî wirzê serê lingan.

 

Çalakîya grevê vêşanî ya Hemsereka Kongreya Komelê Demokratîke (KCD) û parlamentera HDP ya Colemêrgî Leyla Guvene ke vera tecrîdê serê Rayberê PKKî Abdullah Ocalan daya destpêkerdiş 68 rojî pey de verda. Seba piştdayîşê bi çalakîya Leylaye dir zî 30 hepisxaneyan de bi desan tepişnayeyî grevê vêşanî yê bêdem û bêagerayîş de yê. Cinîyê Sîyasetmedar zî ke piştdayîşê xo bi Leylaye dir neql kerdî vengdayîşê peynîkerdişê tecrîdî kerdî.

 

'Tecrîd sucê vera heqê merdiman o'

 

Hemsereka HDPî ya Bajarê Enqereyî Zeyno Bayramoglu, dîyar kerde ke tecrîd sûcê vera heqê merdiman û vera pêameyîşê ke Tirkîya îmza kerda yo. Zeyno wina dewam kerde: "Ganî her kes bêvengîyê xo yê vera na çalakîya ke 68 roj pey xo de verda xira bikerê. Tecrîd tena problemê şarê kurdî û yê HDPyî nîyo. No problemê heme komelî yo. Kesê ke vera nê tecrîdî heta ewro bêveng mendê ganî bêvengîya xo xira bikerê. Êdî wext, wextê bêvengî nîyo."

 

'Ma veng danê platformê cinîyan kenê ke bêvengîya xo xira bikerê'

 

Îdarekara HDPî ya Enqereyî Betul Koca zî dîyar kerde ke Leyla bale anta serê maddaya çareserî, 7ê weçînayîşê Hezîrana 2015an de polîtîkayê hêrişî yenê meşnayîş û wina va: "Kesê ke aştî wazenê tepişnenê. Akademîsyenan tepişnenê. Lebate kenê ke cinîyan bêveng verdê. Wazenê heme kesê ke îtîrazê nê sîstemî kenê bêveng û tena verdê. Coka çalakîya Leyla Guvene bi mana ya. Ma veng danê heme platformê cinîyan ke vera çalakîya Leylaye bêveng nêmanê. Heto bîn ra ma veng danê temamê sazgehê sivîl û yê muxalîf zî ke piştdayîş bidê na çalakî. Ma do vengdayîşê xo yê aştî û demokrasî reyna kenê û fek ci ra vera nêdanê."

 

'Parlamento bêvengîya xo dewam kena'

 

Parlamentera HDPyî Dîlşad Canbaze zî dîyar kerde ke Leyla Guvene îradeyê şarê Colemêrgî ya û rewşa weşîya her ke şina tewr xira bena. Dîlşade wina dewam kerde: "Proses bi problem û xeter o. Parlamento, îkdtîdar  û mûxalefet goşê xo girewtê û lal bîyê. Sere de cinî ganî ke her kes piştdayîş bido waştişê Leylaye."

 

'Ganî her kes hetê xo de veng bido'

 

Dîlşade dîyar kerde ke tecrîd tena Îmralî de nîyo û wina va: "Tecrîd eynî wextî de serê şarê Kurd, Elewî, kedkar, cinî û serê heme kesê muxalifan de yeno meşnayîş. Ganî ma heme hetê xo ra bibê veng. No tecrîd serê şarê Kurdistan û Tirkîya. Heta ke Leyla bêro parlamento verê ma ganî her kes hetê xo ra veng bidê Leylaye."