ŞEHBA - Bi ameyîşê zimistanî hûmara nêweşîyê Kampa Kantonê ê Şehbayî de zêde benê. Cinîyê ke Kampe de dej û zehmetîyê ke ancenê û têkoşînê ke vera nê kenê ardî ziwan.

 

Dimayê hêrişê Hêzê Çekdar yê Tirkan (TSK) û komê girêdayê ci serê Efrînî de, şarê Efrînî Kampê Kantonê Şehbayî de bi ca bî. Cinîyê ke Kampa Kantonê Şehbayî de pêwa îmkanê kêman têkoşînê cu danê vatî ke: "Seba ke şertê zimistanî xidar ê, cuya kampan zî wina xidar benê. Pêwa heme îmkanê kêm ma hewl danê ke cuya xo dewam bikerê."

 

'Ganî vera tedayan warê mîyanneteweyî zî vengê xo berz bikerê'

 

Cinîya bi nameyê Zeyneb Menane dîyar kerde ke rewşa înan zaf zehmet a û wina va: "Seba ke zimistanî şilîye varen, awe kona mîyanê çadire ma. Her şeş domanê mi bi nêweşîyê cîya kewtî. Dermanê seba nêweşîyan zî kêm ê. Coka domanê ma rehet nêbenê. Ganî vera tedayan warê mîyanneteweyî zî vengê xo berz bikerê."

 

'Xeylê lazimîyê ma cu estê'

 

Raniya Bekire zî arde ziwan ke mewsîmê hamnanî de zî nêweşî zaf bîyê, la bi ameyîşê zimistanî dir tewr zêde bîyê û wina va: "Xeylê lazimîyê ma yê cuye estê. La seba ke îmkanî kêm ê, nê lazimî bica nînê. Pêwa heme îmkanê kêm, ma xo ver danê, la ganî hetê hîsgêrî zî hetkarîya ma bikerê û vengê ma bieşnawê. Seba aştî û huzr heme dinya rê vila biba ganî vengê kesê mexdûr û têkoşer bêrê eşnawitiş."

 

'Xeylê nêweşî ma dir ameyî meydan'

 

Siltana Henane zî wina va: "Wexto ke şilîye yena ma nêeşkenê rakewê, seba ke çadire nêeşkena ma şilîye rê bipawa. Xeylê nêweşî ma de ameyî meydan, hîrê domanî mi zî nêweş kewtê. Ez sey cinîyêke tewr zêde zehmetî ancena. Seba ke şertê zimistanî xidar ê, nê dir cuya kampe zî tewr bena xidar. Pêwa heme îmkanê kêm ma lebate kenê ke cuya xo dewam bikerê."