WAN - 40 arêyê ke 1986î de hetê DSÎ ra awa înan ameybî birnayîş nika nînê xebetnayîş. Narînç Ozyaşara ke şahidîya wextê ke arê xebetîyayî kerda qisey kerde û dîyar kerde ke wextêk arê çimeyê berardişî bî, ê wazenê nika zî bixebetîyî. 

 

Qezaya Payîzava ya Wanî ke xeylê cayê tarîxî rê wayîrî kerda. Nê cayan ra herêma tewr muhîm raşteyo ke 4 arêyî ci de esto yo. Arêyê taxa Degîrmendere ya Payîzava ya Wanî verê cû çimeyê debara hemwelatîyan bî û nizdîyê 2 hezar û 700 serran tarîxê înan esto. yeno vatiş ke arêyî hetê ermenîyan ra ameyî viraştiş. 

 

Badê Qirkerdişê Ermenîyan dewijî wayîrê nê arêyan vejîyenî. Nê arêyan ra 15 hebî heta 2010î zî xebetîyayêne, nika terkê qederê xo ameyî kerdiş. Arêyî Kanalê Şamranî reyde ameyî awankerdiş û badê 1986î bi mehneya lazimîya awa bajarê Wanî û girêdayeyî awa merkezî yî, arêyî ameyî padayîş. Sebebêko bîn jî herînayîşê nanê hadre bî. Dewij daxî dest bi herînayîşê nanê hadre kerdî. vengbîyayîşê dewan ra dima arêyî terkê qederê xo ameyî kerdiş. Pêroyê arêyan dayî vindetiş Wexto ke arê xebetîyenî roje de hezar û 500 kîlo ard tehnenî û arê sey merkezê berardişî bî. Pêroyê dormeyê bajarî ra merdimî seba tehnayîşî ameyêne arêyan û her çiqas ke 40 arê bibî zî qelebalix vera merdim kewtêne sira.

 

 Dewijî bi motoran xele ardêne arêyan û bi zerrîwaştox xebetîyayêne. Hemwelatîyê taxe dîyar kerdî ke Karê Awe ya Dewlete (DSÎ) awe birna û pêroyê arêyan dayî vindetiş. Tehmê nanî qedîyayo Narînç Ozyaşare qiseykerdişê xo de wina va: “Nanê ma aye wext bi bereket bî û tehmê ci zaf weş bî. Verê cû awa arêyan Zozananê Nordiz, Xoşab û Şaxî ra ameyêne. Aye wext wesayît çin bî. Ma pê herran şîyêne arêyan. Cayê rakewtişî zî çin bî. La reyna zî ma şîyêne. Xeylê kesî tîya ra koç kerdî. nika kes nan nêpewjeno û nanê hadre herînenî. Tehmê nanî qedîyayo.”