COLEMÊRG- Herêma Colemêrgî de her roje bi desan dew û mezrayî yenî qedexekerdiş. Qedexekerdişê herêman vera dewan de xizmet zî bi mehneya asayîş yeno vindetiş. Derheqê babeta qedexekerdişê dewan de meclîsê bajarî ra Gulîzar Îlîşe qisey kerde. 

 

Herêma Colemêrgî de her roje bi mehneya ‘Herêma asayîş’ desan dew û mezrayî yenî qedexekerdiş. Qedexekerdişê herêman de binpaykerdişê heqan zî zêde benî û hetê ekonomî de şar bêçare maneno. 

Derheqê babeta qedexekerdişê dewan de meclîsê bajarî ra Gulîzar Îlîşe qisey kerde. Projeyê ma yê viraştişê rayîran estbî 

 

Gulîzar Îlîşe destpêkê qiseykerdişê xo de arde ziwan ke qedexeyan vera herêman de berardiş û citkarî çinbîyayî reyde rî bi rî yî û wina va: “Ma 2014î de ameyî weçînayîş. Meclîsê ma ameyî awnakerdiş. Nê meclîsî zaf xurt bî. Aye serran de xebatî zêde ameyêne meşnayîş. Ma aye serran de hetê çinitiş û berardişî de merheleya tewr berzî de bî. La badê ke proses bedilîya hem meclîs qels bîyî û hem zî xebatî. Badê ke OHAL ame îlankerdiş pêroyê herême de asayîş ame îlankerdiş. Projeyê ma ameyî vindetiş û ma zaf zehmetî ant. Herême de şar tewr zêde pê berardiş û heywankarî debara xo keno. La qedexeyan vera heywankarî ame çinbîyayîşî ver û wexto ke beno hamnan şar nêeşkeno şêro zozanan. Seba ke şar asanî şêro zozanan projeyê ma yê viraştişê rayîran estbî. La hetê îdarekarê dewlete ra ameyî betalkerdiş.” 

 

'Heywankarî û berardiş ameyî çinkerdiş'

 

Gulîzare dewamê qiseykerdişê xo de daye zanayene ke dewlete hetê projeyê ke ê waştî bikerî dewre de bîye astenge û wina dewam kerde: “Verê ma dewijan rê pez û mêsê hingimênî vila kerdî. La cayê ke ganî tede mêsî biameyêne miqatekerdiş, ameyî qedexekerdiş. Cok ra xeylê mêsî merdî û têkilîya ma şarî reyde birîya. Herême de qedexeyan vera heywankarî û berardiş ameyî çinbîyayîşî ver. Şar bi reaksîyonin o. Xora herême de OHAL timî estbî û esto. Projeyê ma yê dewan zaf zêde bî. Dewan de goreyê waştişê ma xebatî nêameyî kerdiş û nika zî kêmî bîyî. Ma hewl danê ke dewê ke ameyî qedexekerdiş de xizmet bikerî. Çiqas astengî bibî zî ma xebatanê xo û projeyanê xo domnayî.” 

 

'Ma umid kenî ke weçînayîş bibo wesîleyê prosesêko newe'

 

Gulîzare tewr peynî dîyar kerde ke eke biwazî herême de berardiş zêde bikerî, ganî qedexeyan peynî bikerî û qiseykerdişê xo wina qedênaye: “Wexto ke ma dew û mezrayan de xebatan kenî, tewr zêde waştişê wedarnayîşê qedexeyan vejîyenî. Dew û mezrayan de qedexe tena vernîya berardiş û heywankarî nêgêno, eynî wext de têkilîya înan dinya reyde birîyena. Ganî heme çî ra ver qedexe bêrî wedarnayîş. Vernîya ma de weçînayîş esto, ma umid kenî ke no weçînayîş bibo wesîleyê prosesêko newe.”