ÎZMÎR - Dayîka Aştîye Cemîle Aydina ke piştdayîş da çalakîya parlamentera HDPî ya Colemêrgî û Hemsereka KCDî Leyla Guvene ka bi amancê tecrîdê serê Rayberê PKKî Abdullah Ocalanî ra bêro wedartiş, dest bi grevê vêşanî kerde û da zanayîş ke wijdan çira bêveng ê, wa tecrîd wirzo û heqê înan bêrê dayîş.

 

Parlamentera HDPî ya Colemêrgî û Hemsereka KCDî Leyla Guvene bi amancê tecrîdê serê Rayberê PKKî Abdullah Ocalanî wirzo dest bi grevê vêşanî kerde û çalakîya aye roja 50ine de dewam kena. Piştdayîşê seba çalakîya Leyla Guvene dewam kena. Dayîka Aştîye Cemîle Aydine zî seba tecrîd wirzo veng da heme kesan kerde ke veng vejê û çalakîya xo girs bikerê.

 

Cemîleye dewamê qiseykerdişê xo de da zanayîş ke polîtîkayê vera şarê Kurd  DYAyî xoser nîyê û wina va: "Wa bêro zanayîş ke yê ke şarî kerdo na rewşe Amerîka yo. Bi mîlyonan Kurd çira bê statu yê? Ma ziwan û  nasnameyê xo bi hewayêke azad nêeşkenê bicuyê. Nê heme polîtîkayê mîyannetewî ra bêxoser nîyê. Ewropa de gerek bale biancê nê ser."

 

'Wijdan çira bêveng ê?'

 

Cemîleye da zanayîş ke serê herra Kurdan de bazar yeno kerdiş û wina va: "Domanê ma 30 serrî yo zindanan de yê. Binê îşkenceyî de yê. Dewê ma bajarê ma yenê bombardumankerdiş. Bêşik şar çîyêke wazeno. Keyeyê merdiman yenê veşnayîş. Ma kes nêvîneno? Wijdan çira bêveng ê?."

 

Cemîleye tewr peyîn qiseykerdişê xo de arde ziwan ke Abdullah Ocalan seba heme şaran aştî û azadî waşto û wina va: "Wa çim û goşê xo abikerê û wa bala xo bidê ma. O  îradeyê ma hemine yo. O îdareyêke demokratîk wazeno. Ma şarê ke bi hezaran ser o tîya de cuyenê yê. Tirkî Asya Mîyanên ra ameyî û herra ma pare kerdî. La ma ra vanê 'şima terorîst ê'. Wa tecrîdê serê Birêz Ocalanî êdî wirzo. Ma do heta peynî têkoşînê xo dewam bikerê."