ŞIRNEX - Keyeyê Roboskî seba 7in sergerra qirkerdişê 19 ci ra doman 34 merdimê xo ke bi teyareyê şer ameyî kiştiş vîr bîyarê kom bî.

 

Dewa Roboskî ke qezaya Qilebanê Şirnexî rê girêdaye ya 28ê Kanûna 2011an de teyareyê şer ê Hêzê Çekdar yê Tirkan (TSK) welatîyan gulevaran kerdî, 19 ci ra doman 34 welatî qetil kerdî. Keyeyê Roboskî seba 7in sergerra qirkerdişî de domanê xo vîr bîyarê bernameyê vîrardişî organîze kerdî. Her çiqas hewa serd û varnayişê vewre bi zî Roboskîyijan seba vîrardişî serê siba rew dest bi roja xo kerdî. Keyeyê Roboskî ke fotografê domanê xo girewtî xo dest, camîya dewe de kom bî.

 

Fotografê 34 welatîyan camî de ameyî daliqnayîş. Dewe de dej û hêrs serdestîyê xo ramojneno. Dayîkê Roboskî yewbînan kerdî xo verike û seba dejo ke ameyo sereyê înan lûrnayî û bermayî. Keyeyan seba xêrê domananê xo şekir vila kerdî.

 

Keyeyî pawenê ke vewre varnayîşê xo kêm bikero û dima ra şêrê serê gorê domananê xo.

 

Seba bernameyê vîrardişî leşkeran Roboskî kerd binê abluqa. Leşkeran dekewtişê dewe û goristanî de ameyî bi ca kerdiş. Yê ke wazenê beşdarê vîrardişî bibê teberê dewe ra yenê wesayîtê înan yew bi yew yenê cigêrayîş. Leşkerî serê hemwelatîyan de cigêrayîş kenê û kontrolê nasnameyê înan kenê.

 

Ame zanayîş ke kontrolê rayîrê de hîn şoforan rê cezaya trafîkî ameya birnayîş.

 

Hemsereka Pêroyî ya HDPî Pervîn Buldane û xeylê parlamenterê HDPî, temsîlkarê rêxistinê komelî yê sivîl û huqûqnas do beşdarê vîrardişî bibê.