WAN - Cinîyê ke seba hêrişê çeteyê DAIŞî mecbur mendî ke Kobanî, Reqa û Heleb ra koç bikerê reaksîyon vera hêrişê TSKyî vera Vakur û Rojhelatê Sûrîye dayî û ardî ziwan ke seba hêriş nêeşkenê ageyrê welatê xo.

 

Cinîyê Kobanî, Heleb û Reqayî seba hêrişê DAIŞî Sûrîye ra koçê Tirkîy akerdî, hêrişê ke hema vera herra înan dewam kenê, bi endîşe temaşe kenê. Hêrişê hêzê çekdarî yê Tirkan ke tewr oeyîn vera  Mexmur û Şengalî de yew ci ra domane 7 kesî cuya xo vindî kerd. Tirkîya nika vera Vakur û Rojhelatê Sûrîye zî amadekarîya şer kena û DYA zî da zanayîş ke do leşkeranê xo uca ra biancê.

 

Selma Elahmeda ke Koban ra ya, Şemsa Elîye Heleb û Fatma Elahalide zî Reqe ra ya taxa Hacibekîr ê Îpekyolê Wanî de cuyenê reaksîyon vera hêriş û polîtîkayê şerî dayî û dîyar kerdî ke ê êdî wazenê ageyrê welatê xo.

 

'Cinîyan rayberîya pawitişê cewherî kerdî'

 

Selma Elahmede da zanayîş ke vera hêrişê  çeteyê DAIŞî Koban de têkoşînêke pîl ameyo dayîş û wina va: "Pêrodayîş 10 deqe dûrê ma de ameyne cuyayîş. Bomba ginayne keyeyê ma ro. Her siba ma bi vengê bombayan haya bîne. Ma mecbur mendî ke Kobanê ra vejîyê. Ma şan de saete 01.00 de sînor ra derbaz bî. Sey ma bi hezaran kes derbaz bî. Bi hezaran leşkerê Pirsûsî piştdayîş dayî ma. Dima ra ma otobusan espar bî û ameyî Riha. Ma va ma do ageyrê keyeyê xo. Ma uca de pawitişê xo yê cewherî cuyayî. Bi taybet rayberîya nê cinîyan kerd. Înan va Kobanî ra vejîyê. Ma zî coka vejîyayî. Ez şerê vera Vakur û Rojhelatê Sûrîye, bombardumankerdişê Mexmur û Şengalî şermezar kena. Hêvîdar a ke no şer ganî peynî bibo. Heqê kesî çin o ke heqê ma yê cu ma ra bigîro."

 

'Mêrde û lajê mi cuya xo vindî kerdî'

 

Şemse Elî (55) ke Heleb ra koç kerda wina va: "Ma 5 serrî yo tîya de yê. Têkoşînê vera terorê DAIŞî de lajê mi mêrdeyê mi cuya xo vindî kerdî. Kesî nêwaştêne ke herra xo terk bikero. la mecbur mendî ke koç bikerê. Wexto ke ma newe ameyî ma aşmêke camî de mendî. Dima ra keyeyêke sey bereqe ma dî, ma tede bi ca bî. Domanê qij estbî. Nêweş kewtî. Zaf zehmet derbaz beno la ma mecburê ke xo ver bidê. Ma seba nê keyeyî 250 TL danê. Lajêke mî seba ke emelîyat bîyo nêeşkeno bixebityo. Lajê min o bîn kaxidan kom kenê û roşeno. Ma zaf welatê xo ra hes kenê, ma zaf bêrîya welatê xo kerda. La ma nêeşkenê ageyrê. Seba ke hema şer esto. Ma nêwazenê tu cayêke şer bibo."

 

'Ganî peynîya şerî bêro'

 

Fatma Elhalîde (22) ke Reqa ra koç kerda arde ziwan ke aye zî birayê xo û xeylê merdimê xo şer de vindî kerda û wina va: "Heme çî ma ameyî veşnayîş. Keyeyê ma ame bombardumankerdiş. Seba şerî ma 5 serrî verê bi di laj, mêrde û keyeyê mêrdeyê mi dir ameyî tîya. Bi kiştiş, qetilkerdiş, veşnayîş merdimî nêresenê cayêke. Ganî peynîya nê şerî bêro."