AMED - Leyla Saraça ke hepisxaneyê Bayburtî de hepsîya û resiman xêz kerde sey ‘sucê rêxistine’ ame vînayîş û wina va: "Zaf teda estê. Her wext ceza ro ma yena birnayîş. Xêzkerdişê resiman suc yeno hesibnayîş."

 

Hepisxaneyan de îhlalkerdişê heqan û tedayan vera hepsîyan roj bi roje zêde benê û bi taybet serrê peyîn de vejîyayê sewîyeya tewr cor.

 

Hepisxaneyê Tîpê M yê Bayburtî ke her wext bi îhlalkerdişê heqan yeno rojeve, tedayê serê hepsîyan peynî nêbenê. Leyla Saraçe çîyê ke cuyaya avûkatanê xo rê qalî kerde. Leylaye da zanayîş ke wextêke derg o mektubê înan nînê eşrawitiş û wina va: "Mektubê ke ez eşrawena keye û embazanê xo rê, komîsyonê wendişî ra ageyrenê. Sebeb zî resimê ke mi xêz kerdê û kerdê zerf ramojnenê. Xêzkerdişê resiman suc yeno hesibnayîş. Kitabê Kurdî nêdanê ma."

 

'Wazenê ma acis bikerê'

 

Leylaye da zanayîş ke înan nêbenê revîr û nêweşxane û wexto ke benê zî xeylê problem yenê cuyayîş û wina va: "Pêvînayîşan de keyeyî rastê cigêrayîşan yenê. Hepisxaneyan de grevê vêşanî estê. Embazê ma yê grev de yê estê. Ganî do bişimnê la ne mast û ne zî do danê. Verê dayne la dimayê grevî nêdanê. Wazenê ma acis bikerê. Bi aşman o mektubêmi nêdanê keyeyê mi. Ez do derheqê rewşe de muracatê ÎHDî bikerî."