ENQERE - Temsîlkara Sereka Pêroyî ya EMEPî Şukran Dogane antişê DYAyî ê Sûrîye şîrove kerde û dîyar kerde ke sere de DYA heme hêzê emperyalîst ganî Rojhelata Mîyanên ra vejîyê û ganî Sûrîye bixo qerarê ameyoxê bida.

 

Dimayê îzahatê Serekkomar Tayyîp Erdoganî derheqê Vakur û Rojhelatê Sûrîye ra dima DYAyî zî da zanayîş ke do mîyanê 100 rojî de leşkeranê xo Sûrîye ra bianco. Temsîlkarê Sereka Pêroyî ya Partîya Kede Şukran Dogane derheqê babete de şîrove kerde.

 

Şukrane da zanayîş ke sere de DYA ganî heme hêzê emperyalîst Rojhelato Mîyanên ra xo biancê û wina va: "Eynî wextî de ganî Tirkîya zî hêzê xo uca ra bianca. Derdêke DYAyî sey demokrasî çin o. Şarê Sûrîye wazenê kenê ke ameyoxê xo ê bi xo tayîn bikerê û DYA zî seba no çi bi ca bêro çîyêk nêkeno. Ma zanê ke DYA seba berjewendîyê xo uca de yo. No semed ra ganî DYA uca ra vejîyo. Ganî hêzê bîn zî uca ra vejîyê. Ganî kesê Sûrîye de cuyenê qerarê ameyoxê xo bidê."

 

'Ma nêeşkenê vajê ke DYA zaf dûr kewto'

 

Şukrane tewr peyîn qiseykerdişê xo de da zanayîş ke DYA, Rûsya û Îran de wazeno ke Rojhelato Mîyanên de cayê xo xurt bika û wina va: "Sûrîye seba nê hemleyê girîng ameyê eştiş. Rûsya senîn do vejîyo nîno zanayîş. La ma nêeşkenê vajê DYA zêde dûr kewto. Încîrlîkte bargehê înan estê. Iraq de bargehê înan esto. 100 rojê vernîya ma de çi virazyo ma do bivînê."