ŞIRNEX - Dewa Roboskî de 28ê Kanûna 2011î de netîceyê bombardumanê teyarayanê şerî yê TSKyî de zafê ci doman 34 kesî cuya xo vindî kerdî. Qetlîyam ra nata 7 serrî derbaz bî, la dayîkî hema zî sîya xora danî. Xanim Encuye dîyar kerde ke ê fek têkoşînê xo ra vera nêdanî û kes qêrayîşê înan nêşnawit.

 

Dewa Roboskî ya ke girêdayê qezaya Şirnexî ya Qilabanî ya de 28ê Kanûne 2011î de saet 21.20î de teyareyanê artêşa tirkî yê şerî F-16 Herêma Başurê Kurdistanî bombarduman kerdî û netîceyê bombardumanî de 34 hemwelatijê kurdî ke zafê înan doman bî û sînor ra mazot û cixare ardêne ameyî qetilkerdiş. Qetliyam ra nata 7 serrî derbaz bî, la dayîkî hema zî sîya xora danî. Qetlîyam xetê Ajansê Xeberan yê Dîcle (DÎHA) ke bi Qeranameyê Hukmê Qanûnî ame padayîş, Roj Tv û ANFyî ra serwîsê pêroyê dinya ame kerdiş. Dayîkê Roboskî qewimîyayîşê qetlîyamî ra nata bêmaben têkoşînê xo dewam kenî û hîna zî vengê qêrayîşê înan û dejê înan rîyê înan ra asîyeno. Dewe bi xozaya xo behiştî ya, la cehenem kena vîrê merdimî. Waştişê dewijan oyo kewa hesab bêro perskerdiş. Mehkemeya Qanûno Bingeyî (AYM) bi mehneya ‘belge kêmîyî’ muracatê avûkatan red kerde û aşma gulana verên de Mehkemeya Heqanê Merdiman ya Ewropa (MHME) zî bi eynî mehneyan muracat red kerde. 

 

Qerarê MHMEyî raştê reaksîyonan ame. Nîmeyê înan wendekar bî Amîna Encuya ke lajê xo Salîh Encuyo 18 serrî qetlîyam de vindî kerde qiseykerdişê xo de wina va: “Qetlîyam kewt serra 7. Domanê ma hetê AKPyî ra ameyî qetilkerdiş. Înan parçe parçe kerdî. roja yewin de vatî ‘Nê terorîst î. Ma înan kişt.’ Domanê ma terorîs nêbî. Pêro zî dewij bî. Mecburî vera şîyî sînor. Sewbîna çîyo ke ma pê debara xo bikerî çin o. Ma bê alternatîf î. Ma pê mazoto ke ewja ra ameyêne debara xo kerdêne. Lajê mi wendekar bî. Yê ke ameyî qetilkerdiş ra tewrê kêmî 20ê ci wendekar bî. Domanê mi mekteb ra ame û çanteyê xo rona şî. Dewlete rewşa ma zanayêne. Zanayêne ke domanê ma şîyî. Ma cenazeyan nêdî. 7 serrî yo ke ma edalet wazenî. Ma hewl danê ke payans er de bimanî.”

 

'Seba ke xo rê telefon bigîro şî'

 

Amîna Encuye qiseykerdişê xo yê pêyênan de wina va: “Lajê mi qetlîyam de 18 serrî bî. Qileban de telefonêk weşê ci şîbî. Seba herînayîşê telefonî şî. Va ‘ez 3 reyan şêra, ez do telefon bigîra.’ Mi va ‘meşo.’ Wexto ke şî ez bermaya û o zî berma. Aye roje ra dima nêame û ez tena bermena.” 

 

'Ma edalet wazenî kes vengê ma nêeşnaweno'

 

Xanim Encuya ke lajê xo Seyîthan Encuyî qetlîyam de vindî kerde qiseykerdişê xo de wina va: “Lajê nîşanîya lajê xo kerde û waştîya ci estbî. Pîyê ci 3 reyan estoreyê ci nimit, la o reyna zî şî. Tewr peynî pîyê xo ra va ‘Ez do bê estore şêra.’ Tewr peynî şî û cenazeya ci ame. Kesê ke înan kiştî do helbet ceza biancî. Tîya de kar çin o. Cok ra şîyî. Her kem a edalet wazenî kesêk vengê ma nêaşnaweno. Dayîkî heta ke hesabê domananê xo bipersî do têkoşîn bikerî. dewlete domananê ma kişte û çîyêk zî nêkerde.”