COLEMÊRG -Tirkîya de krîzê ekonomî her roje zêde beno. Seba ke vernîya problemê ekonomî bêra girewtiş, hetê hukmatî ra tu lebate çin a. Bazarê Şarî ke wextê şaredarîya DBPî de amebi akerdiş û qayûm ra heta nika bazar de 30 kargeh ameyê padayîş.

 

Serra 2011an de wextê şaredarîya DBPî de seba ke seyarrotişan rê biba hetkar û berardişê mintiqa bidê naskerdiş, bazarê şarî ke 60 kargehî ameyne akerdiş. Serrê ewil ke bazar ame akerdiş de her roja ke şîne kargeh zêde bîne. La dimayê ke OHAL ame îlankerdiş û dima ra tu kargeh nêameyê akerdiş û seba krîzê ekonomî heta nika 30 kargeh aêeyê akerdiş. Esnafê ke serê siba şinê kargehê xo akenê heta şan de verê ke sîfteh bikerê nê kargehan de manenê û dima ra kargehanê xo gênê û şinê keye.

 

Seba vurnayîş û averşîyayîşî zî lebate çin a

 

Esnafê ke vera krîzê ekonomî û qayûmî şaredarî rê nêrazîbîyayîşê xo ardî ziwan vatî ke ê heta şan de xebityenê, la keda înan veng şina û wina vatî: "No bazar wextê şaredarîya DBPî de ame akerdiş. No bazar 60 kargehan ra ameyne meydan. Serrê vernê de bazar de kar zaf baş derbaz bîne. La nê serrê peyîn de her ke şi rewşe xirab bî. Krîzê ekonomî karê ma da vindertiş. Xora seba nê problemê ekonomî heta nika bazar de 30 esnafan kargehê xo padayî. Amancê akerdişê nê bazarî o bi ke hem berardişê mintiqa bêrê naskerdiş, hem zî ma rê hetkarî bêra dayîş ke ma debara xo bikerê. La nika ma tu feyde nêvînenê. Xora dimayê ke qayûm tayînê şaredarî ame kerdiş, şaredarî ma rê nêbena hetkar. Seba averşîyayîşê bazarî tu lebate şaredarî çin a. Seba ke bazar nîno pawitiş, ma zimistanî zehmetî ancenê. Ma bi hezaran rey problem bi şaredarî dir pare kerd, la ma dir nêbî hetkar. Qaşo bazarê şarî yo, la ne şar esto û ne zî şaredarî meydan de esta. Rewşa ma baş nîya. Eke wina dewam bikero, ma do zî mecbur kargehê xo bigîrê û şêrê keyeyê xo."