WAN - Endama MYKî yê ESPî Sadîye Oke dîyar kerde ke krîzê ekonomî tewr zêde warê cu teng kerdo û va faturê krîzî cinî ney, ganî îqtîdar û patron bidê û ganî heme cinî bêrê têhet, xo rêxistin bikerî û têkoşîn bikerê.

 

Endama Heyetê Îdareyê Merkezî yê MYKî ESPî  Sadîye Oke derheqê krîzê ekonomî de şîrove kerde û dîyar kerde ke modernîteyê kapîtalîst xo spêrnenê krîz û coka zî sîstemêke serê îhlalkerdişî ameyo awankerdiş.

 

'Firîngî sera 9 vay bî'

 

Sadîyeye dewam de wina va: "AKP bi krîzêke cidî dir ameyo rî bi rî. Bi israr zî vano krîzê ekonomî çin o. La bêguman no zur o. Hemwelatî nêeşkenê fatureyê xo, deynê krediyê xo bidê. Xeylê bazirganî dikan girewtê. Merdim nêeşkeno lazimîyê xo bi ca bîyarê. Bi taybet cinî bazaran de nêeşkenê çîyêke bigîrê. 2 kîlo firingî bîyê 10 TL. Se ra 9 vayîya firingiyan zêde bîya."

 

'Muxatabê feqîrî reyna cinî yê'

 

Sadîyeye da zanayîş ke krîzê ekonomî yeno manaya ke cinî do betal bimanê û wina va: "Seba krîzî camêrdî verê xo danê cinîyan. Seba krîzî xeylê dikan yenê girewtiş. Cinî û camêrdî ke tîya xebityenê betal manenê. Cinî hepsê keyeyî yenê kerdiş, camêrdî ke hetê ekonomî de problem cuyenê zî verê xo danê cinîyan. No zî yeno manaya ke şîdetê serê cinîyan tewr zêde beno. Muxatabo ewil ê feqîrî reyna cinî ya. Seba ke mecbur a domanê xo mird bikera. No semed ra zî hem hetê ekonomî de hem hetê psîkolojî de cinî di rey mexdur benê."

 

Sadîyeye arde ziwan ke Tirkîya îstîhdamê cinîyan de rêza 131in de ya û va: "Hetê sanayî û averşîyayîş de Tirkîya rêza dinya de xeylê pey manena. Lîrayê Tirkîya serra peyîn de goreyê poundê Sûrîye se ra 36 erj vindî kerd. Tirkîya îstîhdamê cinî zî se ra 20 o.”