WAN - Songul Ayşîna ke qezaya Payîzava ya Wanî de cuyena, dimayê ke şaredarîya DBPî ya Payîzava Merkezê Cuye ê Cinîyan akerde, merkez de xebitya û nika zî dikano ke akerda xebityena. Songule dîyar kena ke verê rayîrê sûke nêzanayne û nika zî serê linganê xo de vindena.

 

Songul Ayşîna verê ke qayûm tayînê şaredarîya DBPî yê Payîzava bibo, Merkezê Cuya Cinîyan de xebityayne. Songula ke wexto ke keye de xebityayne, derûdorê aye ê komelî çin bi, dimayê  xebate bixobawerbîyayîşê aye zêde bîyo û cesaretê aye virazyayo.

 

'Ez wazena domananê xo bidî wendiş'

 

Songule arde ziwan ke dimayê merkezê cuya cinîyan abîya aye zî şîya û wina va: "Dimayê ke qayûm ame tayînkerdiş, ez girêdayî ÎŞKURî de xebityaya. Dima ra vatî zerrî ra bixebityê. Domanê mi di hebî unîversîte di heb zî lîse wendêne. Pereyê ke mêrdeyê mi gêno qîm nêkeno. Coka ez vizyaya. Mi mexezayêke de dest bi xebate kerde. Embazê bazirgan yê uca vatî werd ma rê viraze. Mi saete 04.00an de werd viraşt. Mi hem tezgahtarî kerdêne hem zî werd viraştêne û rotêne."

 

'Gerre kerdî mi peyser game nêeşt'

 

Songule wina va: "Mi aşmêke de di kar pîya kerd. Dima ra mi va ez cayêke akerî. Xeylê sazgehan ra werd ame waştiş. Dima ra mi qerar da ez cayêke akerî. Dikanê pîyê mi estbi. Mi ewil vernê de uca viraşt. Dima ra mi pak kerd. Seba ke ruhsat çinbi bazirganan gerre kerd. Dima ra şîya dikanêke bîn. Reyna gerre kerdî. Mi sere nêtewêna. No karê ke ez kena xeyalê mi domanî yo. Mi xeyalê xo bi ca ard. Ez kêfweş a. Ez nika bi 4 cinîyan dir xebityena. Ma heme sey embazê yewbînan ê. Wa cinî keye de nênişnê ro. Wa karê xo bikerê."