COLEMÊRG - Aşmanê zimistanî de varayîşê zêde vera koyan ra parçeyê zinaran qerifîyenî û kewenê rayîran ser. Na rewşe bena sebebê qeza û mergan. Têlê ke seba vernîgirewtişê qezayan dorme de ameyî piştiş zî vernîya qezayan nêgênî.

 

Nizdîyê Depîn ya ke 7 kîlometre bajarê Colemêrgî ra dûrî ya de koyan ra parçeyê zinaran qerifîyayî û kewtî rayîrê mabenê Wan û Colemêrgî ser. Şoforê wesayîtan dîyar kerdî ke bi serran o ti tedbîrêk nêameyo girewtiş û îdarekarî hemverê qezayan de tena temaşekerdox manenî.

 

Mudirîyeta Herêma 11. ya Rayîran serra 2014î de îhaleya raşteyê koyan de piştişê têlan girewte. Tena hirê aşman xebat ame kerdiş û xebate vernîya qerifîyayîşê parçeyê zinar û qezayan nêgirewte. Sîstemê têlan ke ameyo montakerdiş zî hetêk ra şoforan dano zehmetî û sîstemê piştişê têlan saxlem nêameyo viraştiş. Cok ra beno sebebê qezayan û vewre vera koyan ra parçeyê zinaran kewenî rayîro ke wesayîtî pira derbaz benî ser.