ŞIRNEX - Emîne Okmena ke 7 aşmî hepisxane de mende û bi serran seba vînayîşê 3 lajê xo hepisxaneyê ke nêşîya nêmendê dîyar kerde ke vera îhlalkerdişê heqan û tedayan ganî seba hepsîyan piştdayîş bêra dayîş.

 

Seba ke çareserîya problemê kurd bi teda û tepiştişan waştî bipelçiqnê, mintiqa de her keyeyî ra qetî endamêke kewto hepisxane û her kesî para xo ci ra girewto. Emîne Okmena Şirnexij e hem bi xo kewta hepisxane û hem zî bi serran o bendeyê 3 lajê xo yê ke hepisxane de yê. Aye bi xo zî 7 aşmî hepisxane de mende û bi serran o seba vînayîşê 3 domananê xo hepisxaneyê ke nêşîya çin o, dîyar kerde ke ganî vera îhlalkerdişê heqan û tedayan seba hepsîyan piştdayîş bêra dayîş.

 

7 aşmî hepisxane de mende

 

Emîne bi serran o seba vînayîşê 3 lajê xo şî hepisxane. Emîne wina vana: "Lajêke mi 10 serrî û 6 aşmî, o bîn zî 7 aşmî, o bîn zî 7 serrî û 6 aşmî mend. Ez zî serrê vîyarte de ameya tepiştiş. Lajê mi hepisxaneyî cîya de mendî. Heta ke ez şîne verê înan mi xeylê ezîyetê zehmetî antêne. Înan zî bi serran zaf çî antî. Xora merdim wexto ke keweno hepisxane, fam keno senîn o. Ez zî û lajê mi zî bêsuc hepisxaneyan de mendî. Domanê mi bi serran hepisxane de mendî."

 

'Ganî ma bêveng nêmanê'

 

Emîneye da zanayîş ke heme hepsîyê bin zî sey domanê aye heqê xo waştê ameyê tepiştiş û wina va: "Lajê mi 10 serrî hepisxane de mend, bê delîl ame tepiştiş. Yê bîn zî wina bî. Ez seba ke şîya Iraq, ameya tepiştiş. Tu sucê mi çinbi. M çîyêke şaş nêkerd. Se beno wa bibo ma fek dewaya xo ra vera nêdanê."

 

Emîneye tewr peyîn qiseykerdişê xo de bale ante serê îhlalkerdişê heqan, teda û îşkenceyî hepisxaneyan de yenê cuyayîş û wina va: "Nê teda seba seba bêvengkerdiş yenê kerdene. La ganî ma teber de bibê vengê înan. Ganî ma vera îşkence bêveng nêmanê û piştdayîş bidê xoverdayîşê înan."