MÊRDÎN - Avşîna yew serrî ke tewrê dayîka xo Hulya Usanmaze zinda de manena, binê çermê sereyê aye de tumor esta. Ganî Avşîne hirê aşman de reyêk şêra nêweşxane, la herinda dermankerdişî de zindan de yena veradayîş û îmkanê dermankerdişî çin a.

 

Hulya Usanmaze qezaya Artuklu ya Mêrdînî de bi îdîaya ‘endamîya rêxistine’ ameyêne muhakemekeriş û 6 serr û 7 aşmî cezaya zindanî aye rê ameye birnayîş û erşawîya zindan. Hulya ke Hemserekîya Partîya Demokratîke ya Şaran (HDP) ya Artuklu kerdêne wayîrê hirê domanan a. Hulyaye di hewte verê cû erşawîya zindanê Tîpa Eyî yê Mêrdînî û mecbur mende ke doman xo ya yew serrî Avşîna nêweşe zî tewrê xo biba zindan. Avşîne nêweşa giran a û binê çermê sereyê aye de tumur esta. Ganî Avşîne bêra dermankerdiş, şert û mercê zindanî de îmkanê dermankerdişî çin a.

 

'Rewşa Avşîne baş nîya'

 

Hulyaye 15 rojîyo ke tewrê kênaya xo zindan de ya û bi rayîrê avûkat û keyeyê xo mesajêk erşawit û seba kênaya xo vengê hîsgerîye daye. Hulyaye ard ziwan ke ê Avşîne 3 aşman ra reyêk seba dermankerdişî benê nêweşxaneyê Edene û tewr peynî di aşmî verê cû Avşîne berdî nêweşxane. Ganî Avşîne bêra dermankerdiş. Hulyaye dîyar kerde ke kênaya aye nika tena bi yew şurubêk yena dermankerdiş û do seba dermankerdişê kênaya xo waştişnameyêk binusa îdareyê zindanî. Hulyaye tewr peynî daye zanayene ke rewşa kênaya aye baş nîya û rîyê aye de masayîş vejîyayî raşte.