Dîlan Babat

 

ENQERE - Arîna qij a ke bi dayîka xo Esma Yilmaze dir Hepisxaneyê Cinîyan ê Mêrdînî de manena, seba rojêke bi pîyê xo Mîhdî Yilmazî dir vejîya teber. Mîhdî Yilmazî dîyar kerd ke Arîne hetê boyedayîş de zehmetî anta û ard ziwan ke seba Arîne baş biba ganî dayîka aye Esma hepisxane ra bêvejîya.

 

Arîn Yilmaza ke bi dayîka xo Esma Yilmaze dir Hepisxaneyê Tîpê T yê Hûmara 2yî Riha de mendêne, hewteyê vîyarte de bi teblîgatê Wezaretê Edaletî newe ra eşrawitî Hepisxaneyê Cinîyan ê Mêrdînî. Arîna ke hepisxaneyê Riha de rewşa aye her ke şî xirab bî û îmkanê dermankerdişî zî nêdayê, hetê pîyê aye Mîhdî Yilmazî ra seba rojêke hepisxane ra amî vetiş.

 

Mîhdî derheqê rewşa Arîne de û eşrawitişê Esmaye ê hepisxaneyê Mêrdînî de qisey kerd û wina va: "Hewteyo vîyarte de eşrawitî hepisxaneyê  Mêrdînî. Ma yewin rey Arîne arde verê xo. Seba derzenê aye estbî ma rojêke verê girewt. Arîne demêke derg nêmusa ma. Şan de her wext dayîke xo geyra. Seba ke şit şimnena zêde nêeşkena verê ma de bimana. Wayê û birayê aye zaf kêfweş bî. Pîya wext derbaz kerdî. Seba ke ma Arîne dayîke aye ra bikerê ganî ma aye newe ra bieşrawê."

 

'Arîne nêeşkayne boye xo bigîra'

 

Mîhdî dewamê qiseykerdişê xo de da zanayîş ke Arîne seba kontrolî berdê nêweşxane û wina va: "Mi derzenê aye rûtîn dayî piro. Rewşa weşîya Arîne hema sey xo ya. Astimê aye aver şîyo. Doktor derman nuşt û va nê dermanî benê sebebê helnayîşê estan. Dêsê hepisxaneyî awe anta. Arîne kîlo vindî kerdebî, la nika baş a. Seba astimî nêeşkena boye bigîra û refleksan ramojnena."

 

Mîhdî tewr peyîn qiseykerdişê xo de ard ziwan ke ganî Arîn û dayîke aye hepisxane ra bivejîyê û nê şertan de Arîne nêeşkena dayîka xo ra bivisya û seba Arîne baş biba ganî dayîke aye hepisxane ra bivejîya.