Stêrvan Bêrîtan

 

QAMIŞLO - Di wayê bi nameyê Leyla û Emel Muhameda ke Şam ra seba şe remayî û Efrîn de bi ca bî û dima ra seba hêrişê serê Efrînî ameyî Qamişlo de bi ca bî û vatî: "Ma nika têkoşînê cu danê ke serê linganê xo de vinderê."

 

Leyla û Emel Muhameda ke Şam de cuyayne û wayê yewbînan ê, dimayê şerê Şamî koçê Efrînî kerdî û dimayê hêrişê dewleta tirk û komê girêdayê ci koçê Qamişlo kerdî vatî: "Efrîn cayêke asayîş bi la bi hêrişê dewleta tirkî hizur vindî bi û ma mecbur mendî ke derbazê Qamişlo bibê. Nika ma tîya de têkoşînê cu danê."

 

'Keyeyê ma ame rijnayîş'

 

Emele wina va: "Wexto ke ma Şam de bî, keyeyê ma ame rijnayîş û ma bêçare mendî. Ma koçê Efrînî kerd û uca de cuyake hizur estbî. Dimayê hêrişan serê Efrîn ra ma derbazê Qamişlo bî û şarê Qamişloyî ma kerd xo verêk e. Mêrdeyê waya mi zî cuya xo vindî kerd. Nika ez, waya xo û domanê xo pîya cuyenê. Ma tîya pêwa îmkanê kêm hewl danê ke serê linganê xo de vinderê. Ma bawerîya xo bi şerwananê xo anê ke ê do Efrîn xelas bikerê. Ma wazenê Efrîn destê dagirkeran ra bêro xelisnayîş."

 

'Nika ma tîya têkoşînê cu danê'

 

Leylaye zî wina va: "Ez 13 serrî ya xo de ameya zewicnayîş. Nika kênayêke û di lajê mi estê. Dimayê ke mêrdeyê mi cuya xo vindî kerd, keyeyê ey wayîrê mi nêvejîyayî. Ez ameya verê waya xo û ma piştdayîş da yewbînan. Dimayê şerî ma derbazê Efrînî bî û ma uca cuyêke bi hizur derbaz kerde. Ma nika têkoşînê cu danê ke ma bieşkê serê linganê xo de vinderê. Efrîn cayke bi asayîş bi, la bi hêrişê dewleta tirkî hizur vindî bi û ma mecbur mendî ke derbazê Qamişlo bibê. Nika ma tîya têkoşînê cu danê."