ŞIRNEX - Yildiz Elçîogluye dîyar kerde ke qayûm tayînê şaredarîya Hezexî bîyo û xizmet şarî rê nêkeno û wina va: "Hamnanî derdêke cîya, zimistanî derdêke cîya. Şaredarî xo ra bêwayîr a. Qayûm îdia keno ke awa şilîye kewta mîyanê awe û înan coka awe birnaya."

 

Roja ke qayûm tayînê şaredarîya Hezexî bîyo, şarî rê tu xizmet nêameyokerdiş û problem dewam kenê. Hamnanî bi aşman awe û cereyan qeza de ameyne birnayîş û bi rojan welatîyan tankere ra awe antêne. Bi hewteyêke reyna awe ameya birnayîş û ame zanayîş ke seba awa şilîye kewta mîyanê awe, ameya birnayîş. Welatîyê taxe ra Yildiz Elçîogluye va ke ê acis bîyê.

 

'Hamnanî cîya, zimistanî cîya'

 

Yildize da zanayîş ke hamnanî di aşmî awe înan ameya birnayîş û aşma Remezanî bêawe derbaz kerdê û wina va: "Xora şaredarî bêkes a. Mi şî nê rîyê înan de zî va. Tena derdê meaşanê xo de yê. Şar xemê înan de nîyo. Aşma Remezanî û roşan de awe ma çin bî. Tewr peyîn mi bîdon girewt û ez şîya qeymeqamtî. Avûkatê qeymeqamî heqaret ro mi kerdî û mi eştî teber. Ma pereyê xo danê.  Ma hamnanî bi tankêran awe ante. Pereyê awa tankêre zî ma ra girewtî. Wextê ke awa ma nêameyne zî fature eşrawitêne. Pere girewtêne û awe nêdayne."

 

'Ma ameyî vetiş'

 

Yildize tewr peyîn qiseykerdişê xo de dîyar kerde ke şîyê şaredarî la mudirê ozel kalemî ê goşdarî nêkerdê û wina qedêna: "Nika eynî çî bi. Ma nêşêrê verê înan çareser nêkenê. La ma do şêrê verê kam î? Şaredarî cayê ke gerek şarî rê akerde bê. La dimayê ke qayûm ame şaredarî şarî rê amî padayîş. Bi hewteyêke yo no serd de awa ma nîna. Ma 15 cinî û di camêrd pîya şî verê qayûm. Ma berdî verê mudirê ozel kalemî. Ma uca de rastê heqeretan ameyî. Ma va ‘heta awe nêro ma nêwirzenê' Mudirî va ‘vejîyê ya zî ma do şima bikerê teber'. Ma vetî. Yenê parkan viraznenê fotografanê înan ancenê û şinê. Fotografê parkan meancê, kuçeyan pak bikerê."