ŞIRNEX - Zîlana 7 serrî ke 3 serrî verê qedexeyê tebervejîyayîşê kuçeyan ê Cizîrî de gule ginabi bedenê aye ro û hema zî rayrayîş de zehmetîyan ancena. Doktoran seba Zîlane va 'esteyê aye seba birîne helênê' û nika  dermankerdişê fîzîkî vînena, ganî emelîyatê diyîne zî biba.

 

Serê qedexeyê tebervejîyayîşê kuçeyan ê Cîzîrî ke 14ê Kanûna 2015an de ame îlankerdiş û 79 rojan dewam kerd de 3 serrî derbaz bi. Qedexe de bi seyan kesî cuya xo vindî kerdî û xeylê zî bi hawayê cîya birîndar bî. Qedexe de domanî bî hedefê guleyan, xeylê domanî seba nê cuya xo vindî kerdî û birîndar bî. Yew înan ra Zîlana 7 serrî bî. Bi dayîka xo dir şîne dikan bî hedefê guleyan. Rêçe guleyan hema bedenê Zîlane de estê û nika seba emelîyatê diyîn xo amade kena. Xeylê rayan rayrayîş de zî zehmetîyan ancena.

 

'Gule gêna pîze aye ro piştîya aye ra vejîya'

 

Hamdîye Yîgîte derheqê hedîseyê 15ê Çeleyî 2016an de taxa Yasef de ame cuyayîş de qisey kerde û wina va: "Hedîse 3 serrî verê  qedexe de ame meydan. Polîsî ameyî taxe. Vatî, 'Ma keye de cigêrayîş kenê' û kewtî keyeyan. Ma zî teber de vindertî. Kêna mi zî waşte ke şêro market. Mi zî polîs ra pers kerd. Ey zî va ‘beyraqa sipî bigî û şo'. Ma şî dikan pey ma ra vengê guleyan ame. Gulevaran kerdêne. Wayîrê dikanî rema. Ez, kêna mi û çend keyeyê bîn dikan de mendî. Guleyêke gina dês ro û gina kêna min ro. Gule pîzeyê aye ra vejîya piştîya aye ra vejîya."

 

'Esteyî seba birînan helîyayî'

 

Hamdîye va dimayê hedîse şîyê nêweşxane û uca de çîyêk nêkerdê û wina va: "Ma eşrawitî Amed. Kêna mi dimayê ke birîndar bî nîm saet erd de mende. Ma kêna mi berd keye. Dima ra ma şî nêweşxane. Vatî berê Amed. O wext emelîyat bî. Serrêke amî dermankerdiş. Bî serrêke dermankerdişê fîzîkî vînena. Doktoran va 'seba birînan esteyî helîyenê'. Hema pîze û pişîya kêna min de birîn estê."