DÊRSIM - Dîlîf Gulere dîyar kerde ke Xozat de serra 1994an de bi zor dewa xo ra ameyê vetiş û wina va: "Kal û pîrê ma 38 cuya bî. Dima ra serra 1994an de reyke bîn 38 ame cuyayîş."

 

Polîtîkayê asîmîlasyonî yê vera Dêrsimî dewam kenê û dimayê 38an, demo tewr bi teda ame cuyayîş serrê 90an de zî ame cuyayîş û bi hezaran dewî ameyî vengkerdiş. Yew nê dewan ra zî dewa Zankîrek ê Xozatî bî. Dîlîf Gulera ke o wext mecbur mende koç bikera û eynî wextî de dewa Govuçlere ta zî Fecîre Yildiza ke dewa xo terk nêkerde serrê  1994î qalî kerde.

 

'Ma seba tedayan mecbur manenê vejîyê'

 

Dîlîfe da zanayîş ke bi sebebê operasyonê leşkerî dewê înan ameyê vengkerdiş û wina va: "Ma doman û ganê xo bi zor xelas kerd. O wext bi hezaran kes mecbur mendî koç bikerê. Ma bajar de rastê asîmîlasyonê kulturî ameyî. Domanê ma ziwanê xo xo vîr ra kerdî. Ma şî dewê kesê bîn. Dima ra ma şî dewa nêzdî yê dewa Govuçler. Ma 10 serrî uca de mendî. Çarçeweya projeyê agernayîşê dewan de ma reyna ameyî dewa xo. Dima ra ma şî dewêke nêzdîyê dewa ma ke nêamebî vengkerdene. Uca de zî teda estbî. Heywanê ma ameyne bombakerdiş. Leşkeran dayne domananê ma ro."

 

'Reyna 38 ame cuyayîş'

 

Dîlîfe arde ziwan ke Dêrsimijî bi hesretê herra xo cuyayê û wina va: "Xeylê kesî feqîrî ant, hesret ant. Waştêne cenazeyê xo bîyarê la seba feqîrî nêeşkayî bîyarê. Hîn kal û pîrê ma 38 vînayîbî. Dimayê 94an reyke bîn zî 38 cuyay."

 

Fecîra ke seba dewa xo terk nêkera xo ver daya û wina va: "Vatî gerek dewe terk bikerê. La ma va 'şima ma bikşê zî ma terk nêkenê’. Seba ma zî dewe ra nêvejîyayî, ma berdî qerekole. Heywanê ma daristan de mendî. Mi heywanan daristan ra kom kerd. Ma rastê heqeretan ameyî. Domanê ma veşan mendî. Yê ke koç kerdî şî. Kal û pîrê ma tîya terk nêkerdî."