WAN - Merkezê Kulturê Bêrîvane ke hetê şaredarîya Îpekyol ê DBPî ra amebî vuraştiş, bi seyan domanan ci de perwerdeyê ziwanê dayîke girewtêne û xebatê kultur û hunerî meşnayne. Merkez hetê qayûm ra ame vurnayîş û êdî domanî nêşinê merkez. Domanan ra Vîyane wina va: "Uca sey keyeyê mi bi. Ez do rijnayîşê keyeyê xo rê destûr nêdî."

 

Merkezê Kulturê Bêrîvane hetê Şaredarîya Îpekyolî ê Wanî yê DBPî ra 2015an de seba domanan amî awankerdiş. Merkez mintiqayê TOKÎ yê Sixkî de ame akerdene, ci de 6 beşê sey muzîk, tîyatro, folklor, seramîk û ziwanê Kurdî de perwerde ameyne dayîş. Xeylê domanî mabêne emrê 11-12 serrî beşdarê qursan bîne. Nêzdîyê 120-150 wendekarê ke ameyne estbî. Serê waştişê keyeyan ra hûmara wendekaran zêde bî. Perwerde xeylê xo Kurdî ameyne dayîş. Verê hunerî de dersê edebîyatî zî ameyne dayîş.

 

Taxa Sixkî de pêroyî keyeyê ke dewan ra koç kerdê bi ca bîyê. Coka bîyayîşê merkezî tîya manayêke cîya yo. Bi merkez ame hedefkerdiş ke domanan bi huner dir bîyarê têhet û huner aver berê. La bi ameyîşê qayûm dir Merkezê Kulturê Bêrîvane zî sey sazgehê bînan ame pasîfekerdiş. Dimayê ke mamosteyî kar ra ameyî vetiş, keyeyan domananê xo nêeşrawitî. Dimayê qayûm muhtewayê merkezî zî ame vurnayîş.

 

'Merkezê Kulturê Bêrîvane sey keyeyê mi bi'

 

Wendekara Merkezê Kulturê Bêrîvane, Vîyane dîyar kerde ke verê qayûm şîne merkez û seba dersê înan Kurdî bîyê zaf kêfweş bîyê û wina va: "Ez teberê wendegehî her ca de Kurdî qisey kena. Uca de embazê mi virazyayî. Ez parekerdiş musaya. Seba ke merkezê destê ma ra girewtî ma zaf xemgîn ê. La ma do uca zî qayûm ra bigîrê. Uca sey keyeyê mi bi."

 

'Ma domanê xo bi zerrîya rehet eşrawitêne'

 

Emîne Bozkurta ke di waye aye şîne merkez dîyar kerde ke wexto ke wayê aye şîne merkez xeylê aver şîbî û wina va: "Bixobawerîya înan virazya. Ma bi rehetî domanan eşrawitêne. La êdî ma nêeşrawenê. Domanan bi ziwanê xo perwerde girewtêne. La dima ra na xebate amî wedartiş û ma zî domanan nêeşrawit."