MÊRDÎN - Nisêbîna ke 120 hezar nufusê aye esta, Nêweşxaneyê Dewlete ya Nisêbînî, seba kêmasîyê xebatkar û hacetan hem şar û hem zî doktor acis bî.

 

Nêweşxaneyê Dewlete ya Nisêbînî dimayê pêrodayîşan texrîb bibi û amebi rijnayîş. Vera nêweşxaneyê newe bibi qerekol û qeza bi no hewa xizmetê weşî ra bêpar mendib. Dima ra nêweşxaneyêke newe ame viraştiş la nika zî seba kêmasîyê doktor û hacetan şar û doktor acis bî. Nêweşxane de makîneyê Emarî çin o û yew doktorêke nêweşîya cinîyan esta. Xeylê nêweş î sewqê cayê bînan benê.

 

'Xeylê nêweşan eşrawenê cayê bînan'

 

Şar seba kêmasîya doktoran bi saetan dore de manenê û xeylê nêweşan zî eşrawenê cayê bînan. Nêweşxane de makînayê Emarî çin o û no semed ra nêweşan eşrawenê Mêrdîn û bajarê bînan. Cinîyêke bi nameyê E. wina va: "Ez serê siba ra dore da ya ke rêze bêro mi ke fîş bigîrî. Doktorî vanê hacetê lazim çin ê. Qezayêke 120 hezar nufusê aye esta, makîneyêke emarî çin o. Beşê lezgîn xebityeno la doktor çin o."

 

Doktor zî reaksîyon ramojnenê

 

Çîyê ke doktor û xebatkarê nêweşxaneyî qalî kerdî wina vatî: "Ma verê bi desan rey pisporê nêweşxaneyê cinîyan waşt. Nika yew doktorêke nêweşxaneyê cinîyan esto. O zî qîm nêkeno. Xeylê nêweşî peyser şinê. Ne doktoran ne zî hacetan eşrawenê. Ma bi desan rey muracat kerd."