Berîtan Canozer

 

AMED - Piştdayîşê seba hemsereka KCDî û parlamentera HDPî ya Colemêrgî Leyla Guvene ke bi 30 rojî yo grev de ya û grevê aye dewam keno. Cinîyan grevê vêşanî ê Leylaye selam kerdî û dîyar kerdî ke ya do tecrîd bêro wedartiş û ya zî do heme têkoşînê heqdar ê Leylaye gird bikerê.

 

Hemsereka KCDyî û parlamentera HDPî ya Colemêrgî Leyla Guvene bi amancê tecrîdê serê Rayberê PKKî Abdullah Ocalanî ra bêro wedartiş dest bi grevê vêşanî kerde û çalakî roja 30in de dewam kena. Her ca ra seba piştdayîşê çalakîya Leylaye îzahat yenê dayîş. Bi taybet cinî rayberîya çalakîyan kenê.

 

'Leyla bî vengê şarê Kurd'

 

Cinîya bi nameyê Hedle Ugure ke yew cinîyan ra ke piştdayîş dana çalakîya Leylaye wina va: "Çîyê ke ganî şarê Kurd bikero, Leyla kena. Heta tecrîd nêro wedartiş rayîrê aştî zî anêbeno. Şer dewam keno. Leyla rûmetê ma ya. Ganî her kes piştdayîş bido aye. Leyla bî vengê şarê Kurd û bedenê xo da ver merdişî. Hema ke rewşa aye giran nêbîya, ganî waştişê aye bêrê qebûlkerdiş. Nika hepisxaneyan de grevê vêşanî estê. Ganî ma bi çalakîyê xo hêz bidê înan. Ma înan tena nêverdê."

 

'Ganî dewlete waştişê Leylaye qebul bikera'

 

Şukran Efeturke zî çalakîya Leylaye selam kerde û wina va: "Merdiş reyke yo. Ya bi rûmet ya zî bê rûmet merdimî mirenê. Kesê ke merdişo bêrûmet tercih kenê do qetî hetê şarî ra nêrê vîrardiş. Yê ke seba azadîya şarê Kurd ganê xo dayê do qetî nêrê xovîrrakerdiş. Leyla aşmêke yo grev de ya. Ganî dewlete waştişê Leylaye qebul bikera."

 

'Dewaya Kurdan ra bi rûmet ê' 

 

Berîvan Kutlu zî wina va: "Şarê Kurd tarîx de her wext rastê qirkerdiş û nêheqîyan ameyê. La şarê Kurd pêwa her çî fek têkoşîn ra vera nêdayê. Seba Leylaye ganî cinîyê Kurdan vejîyê meydanan. Na tena dewaya Leylaye nîya na dewaya heme hepsîyê sîyasîyan a. Na dewaya Kurdê bi rûmetan a."