ŞIRNEX - Sîyê Parke ke Taxa Cûdî yê Cizîrî de kuçeyê Gulene de ameyê ronayene, hetê şaredarîya ke qayûm tayînê ci ame kerdene ameyî wedartiş, hemwelatî seba şîlîya ke vara û çamure virazya dêsan pey gênê û derbaz benê.

 

Qezaya Cizîrî yê Şirnexî de wextê qedexeyê tebervejîyayîşê kuçeyan de taxa cudî ke zirar dîbî kuçeyê Gulene hetê şaredarî ra sîyê parke ameybî ronayîş. La hetê şaredarîya ke qayûm tayînê ci ame kerdene bi sebebê ke do asfalt bikerê sîyê parke ameyî wedartiş. Seba ke sî aşmêke ver ameyî wedartiş, sîyê newe nêameyê bicakerdiş û asfalt zî nêameyî kerdiş her ke şîlî varena kuçe mîyanê çamure de manenê û hemwelatî wexto ke kuçe ra derbaz benê xo bi dêsan xo gênê û derbaz benê."

 

'Her kesê ke derbaz beno mîyanê çamure de maneno'

 

Hemwelatîyêke va xebatê ke qayûm keno açerneno îşkence û wina va: "Qayûm ma perîşan kerdî. Vatî ma do asfalt bikerê û sîyê parke wedarnayî. La cayê ke yenê asfaltkerdiş dûrê tîya yo. Eke wina bi çira sî wedarnayî? Bi aşmêke ma nê ezîyetî ancenê. Verê ke çile bêro ma na rewşe de yê. Ma do çile de se bikerê? Seba na çamure wesayîtî zî wexto ke derbaz benê hêdî derbaz benê. Domanî seba çamure nêeşkenê vejîyê teber."