MÊRDÎN - Mêrdîn de grevê vêşanî ke seba piştdayîşê bi çalakîya Leyla Guvene dir 7-8-9ê aşmî de dest pêbikerdêne, dimayê ke polîsan eştî serê awanîya Mêrsînî ke çalakîya grevê vêşanî ci de estbî û 10 kesî ameyî tepiştiş do verê tarîxê ke amebi neqlkerdiş siba dest pêbikerê.

 

Hemsereka  Kongreya Komelê Demokratîke (KCD) û Parlamentera HDPî ya Colemêrgî Leyla Guvene 26 rojî yo vera tecrîdkerdişê Rayberê PKKî Abdullah Ocalanî grevê vêşanî ê bêdem de ya. Seba piştdayîşê çalakîya Leyla Guvene, endam û îdarekarê Rêxistinê HDPî yê Mêrsînî vizîr awanîya xo de seba 3 rojan dest bi çalakîya grevê vêşanî kerdibî. Polîsan vizîr şan de eşt serê awanî û 10 çalakgeran tepişnayî. Dorgirewtişê awanîya HDPî zî dewam keno. Mêrdîn de grevê vêşanî ke 7-8-9ê aşmî de dest pêbikerdêne, seba Mêrsîn de grevê vêşanî de 10 kes ameyî tepiştiş verê tarîxî ke amebi neqlkerdiş de dest pêbikero.

 

Merkezê Pêroyî ya Partîya Demokratîke ya ŞAran (HDP) îzahatêke nuşteyî weşêna û wina va: "2-3-4î aşme de Mêrsîn, 3-4-5ê aşme de Enqere seba 3 rojan qerarê grevê vêşanî amebi girewtiş. Na çarçewa de endam û îdarekarê Rêxistinê HDPî yê Mêrsînî vizîr awanîya xo de seba 3 rojan dest bi çalakîya grevê vêşanî kerdibî û dimayê demêke kilm ameyî tepiştiş. Tehemmulê înan seba nê heqê demokratîk rê zî çin o. Vera tecrîdo girankerde yê Abdullah Ocalanî ser û hêrişê ke Îdareyê ma yê Mêrsîn rê ame kerdiş siba heme parlementerî bajarê ke ameyê weçînayîş seba hîrê rojan dest bi grevê vêşanî kenê."