MERSÎN - Polîsan eşt banê HDPyî yê Mersînî ser, 10 tenî yê ke seba paştîdayîşê çalakîya Leyla Guvene dest bi grevê vêşanîye kerdîbî ameyî tepiştiş.

 

Parlamentera HDPyî ya Colemêrgî û hemsereka Kongreya Komelê Demokratîkî (KCD) Leyla Guvene semedê vervindertişî tecrîdê rayberê şarê Kurdî Abdullah Ocalanî nê 25 rojî yê ke grevê veşanîye de bî. Grevê Leyla Guvene ser, koma HDPyî ya Mersînî biryarê paştdayîşê Leyla Guvene dabi û inan semedê 3 rojan dest pê grevê veşanîye kerdbi.

 

Dordormaleyê cayê HDPyê Mersînî hetê polîsan ra qefelnîya û zerreyê bîna de hetê polîsan ra cigêrayîş dest pêkerd. Ame vatene ke polîsan zerre de çîyê ke eleqeyê ci bi grev û Abdullah Ocalanî esto, heme arê dayî û 10 xebatkarî zî ameyî tepiştiş.

 

Sereştişê polîsan ra dima wekîla hemserekîtîya koma HDPyî Fatma Kurtalane, parlamenteranê HDPyî ra Ridvan Turan, Tulay Hatîmogullari, Meral Daniş Beştaş û Kemal Pekoz, hemsereka SYKPyî Canan Yuce û pawitoxî şîyî cayê HDPyî yê Mersînî.

 

Parlamenterê HDPyî yê Mersînî Ridvan Turan, nê tepiştişî ser va ke; “Polîsî vat ke ‘no sereştiş yew îxbarî ser o biyo.’ Ixtîmal o yo ke no îxbar zî xebatkaran ser de bi. Ma heta nika pawitêne ke waştişê Leyla Guvene ê ke bîyî semedê grevî, bidîyê ci, heq bêro ca la mixabin sereştiş ame ca.”

 

Hetê bînî ra ame zanayene ke polîsan ewro berpirsîyaranê HDPyî gerayê bî û vato ke; “Yew bi yew nameyanê xebatkaran bidê ma yan zî ma erzenî ûca ser û perune tepişnenê.”

 

Ê ke ameyî destbendkerdene ; hemsereka HDPyî ya Mêrsînî Zûhal Onene, Alî Alper, Gulê Kaya, Mehmet Aykût, Zahîde Yavûze, Abdulbakî Akkoyûn, Alî Bîlen, Dîyar Tûrgût, Bahattîn Îlet û Dogan Atay.