ENQERE - 10 parlamenterê ke mîyanê înan de hemsereka HDPyî Pervîn Buldane zî esta hemverê tecrîdê girankerdeyî yê serê rayberê şarê Kurdî Abdullah Ocalanî do meclîsî de dest bi grevê vêşanîye bikerê.

 

Hemsereka Kongreya Komaleyê Demokratîke (KCD) û Parlamentera Partîya Demokratîke ya Şaran (HDP) ê Colemêrgî Leyla Guvene vera tecrîdkerdişê Rayberê PKKî Abdullah Ocalanî 26 rojî yo ke grevê vêşanî yê bêdem de ya. Mêrsîn de vizîrî vera tecrîdî û seba piştdayîşê Leylaye 10 endam û îdarekarê partî çalakî de bî hetê polîsan ra ameyî tepiştiş. HDP bi lezgînî cewabê tepiştişan da.

 

HDPyî qerar girewt ke vera tepiştişê endam û îdarekaranê xo do çalakîya grevê vêşanî vila bikerê û bi no hewa cewab bidê.

 

Na çarçewa de çalakîya grevê vêşanîye do roja Sêşemeyî tavilî dimayê kombîyayîşê grûbe dest pê bikero û 2 rojan dewam bikero.

 

Hetêna ra heme organîzasyonanê partîye rê talîmatê destpêkerdişê grevê vêşanîye yê 3 rojan ame şirawitene. Organîzasyonê bajaran do 3ê Kanûne de dest bi çalakîyan bikerê. Organîzasyonê ke hadreyîyê înan a roje nêbîyê temam zî do 4ê Kanûne de dest bi çalakîyan bikerê. Parlamenterê ê şaristanan zî do cayê ke ameyê weçînitene de tewrê çalakîyan bibê.