ÎZMÎR - Hemsereka DBPyî ya Îzmîrî Melîs Akgul dîyar kerde ke ê piştî danî grevê vêşanîye yê parlamentera HDPyî yê Colemêrgî û Hemsereka KCDyî Leyla Guvene û wina va: “Grevo ke Leyla Guvene daya destpêkerdiş waştişê heme şaran o. No waştiş omidê azadîye yê heme şaran o.”

 

Hemsereka Kongreya Komelê Demokratîke (KCD) û Parlamentera Partîya Demokratîke ya Şaran (HDP) ya Colemêrgî Leyla Guvene seba ke tecrîdo ke Rayberê Şarê Kurdî Abdullah Ocalanî ser o yeno domnayene şermizar bikera, 8ê teşrîna peyêne ra nata Zindanê Tîpa Eyî yê Amedî de grevê vêşanîye de ya. Roniştişê doza Leylaye tewr peynî 7ê teşrîn peyêne de 9. Mehkemaya Cezaya Giran ya Amedî de ameybî dîyayîş û 8ê teşrîna peyêne de dîyar kerde ke aye do bikewa grevê vêşanîye. Çalakîya Leylaye her ke şona hîna zaf hîra bena.

 

Hemsereka Partîya Herêmê Demokratîkî (DBP) ya Îzmîrî Melîs Akgule derheqê muhîmîya piştîdayîşê çalakîya Leylaye ke kewta roja 26. de qisey kerde û dîyar kerde ke tecrîd parçeyê polîtîkayê şer û şîdetê dewlete yo.

 

Melîse qiseykerdişê xo de ard ziwan ke eke Rayberê Şarê Kurdî Abdullah Ocalanî reyde muzakere dest pêbikerî do heme şarî feyde bigîrî û tecrîd tena zirar nêdano kurdanî eynî wext de zirar dano pêroyê Rojhelato Mîyanênî û Dinya. Melîse dewamê qiseykerdişê xo de wina va: “Tecrîdo ke Abdullah Ocalanî ser o yeno domnayene îmha û înkarkerdişê şarê kurdî ra cîya nîyo. Sîstem sere de Îmrali û dima ra pêroyê şaran ser de bîyayeyê xo domneno.

 

‘Îqtîdar mase qelibna’

 

Melîse tewr peynî prosesê çareserî ke hetê heyetê Îmrali ra ameybî destpêkerdiş ard vîre û wina qedênaye: “Îqtîdar vera hende israrê şaran û Abdullah Ocalanî de maseya muzakereyî qalibna. Grevê Leyla Guvene tecrîdo ke Rayberê Şarê Kurdî Abdullah Ocalanî ser o yeno kerdene vera pê ameye û ganî waştişê Leylaye pêroyê şaran rê bêro vilakerdene. Îzmîr, Stenbol û Amed veng bidêne vengê Leylaye.”