ÎZMÎR - Fîgen Şahîna 2015an de Edene de amî tepiştiş û tepiştiş de rastê îşkence amîbî. Waya Fîgene, Nurgul Turhale dîyar kerde ke çîyê waya aye hepisxaneyê Burhanî de cuyena dewamê nê îşkencî yo û wina va: "Fîgene bêveng nêmende, no semed ra amî cezakerdiş. Fîgene tepiştiş de zî sere wedarna. Çîyê ke înan waştêne bipelçiqnê îradeyê cinîyan bi.

 

Fîgen Şahîna ke 2015an aşma Tebaxe de Edene de amî tepiştiş û hetê polîsan ra rastê îşkenceyê zayendî amî. Fîgena ke eşrawitî hepisxane 20 serrî ceza ci amî birnayîş. La kesê ke îşkence Fîgene kerdî ceza ro înan nêamî birnayîş. Seba şal û puşîya aye rê tena 6 serrî ceza amî birnayîş. La seba îşkencekerdoxan çîyêk nêame dayîş.

 

Waye aye, Nurgule bale ante serê rewşa aye û tedayê ke hepisxane de yenê kerdene û wina va: " îşkence uca de zî dewam keno. Wexto ke benê nêweşxane rastê heqaret û nengan yenê. Ferzkerdişê cil û belgan estê. Rastê tehdîdan yenê. Verê 3 hepsîyê sîyasî estbî 5 tena estê. Dimayê îşkenceyê zayendî yê vera Fîgene, sûcdaran rê ceza nêamî birnayîş. Peyserê nê Fîgene amî sucdarkerdiş. Edalet dadgehan de bi ca nîno. Komelî de zî bi ca nîno. Awanî û taxa ma rê tedayan kenê. Nêverdenê domanê mi bi domananê înan dir kay bikerê. Îmza komkerdî ke ma awanî ra bierzê. Çîyê ke ma cuyenê netîceyê polîtîkayê dewlete yê.”

 

Nurgule tewr peyîn qiseykerdişê xo de arde ziwan ke Fîgene goreyê dewlete cinîyêke makul nêbî û seba ke bêveng nêmende amî cezakerdiş, seba ke vera îşkenceyan sere wedarna amî cezakerdiş. Nurgule arde ziwan ke yê ke hewl danê bipelçiqnê îradeyê cinîyan o û ganî heme cinî wayîrê Fîgene vejîyê.