WAN - Cinîyê ke bi 4 serrî yo sera de xebityenê û rotişê sebzeyan debara xo kenê eynî wextî de bi nê sebzeyan berardişê tewir bi tewir bidest kenê.

 

Verê qayûmî Wan de bi piştdayîşê Şaredarîya Îpekyolî de nêzdîyê 4 serrî verê seba keyeyê ke rewşa ekonomîya înan baş nîya sera ameybî awankerdiş. Serayê ke taxa Şerefîye de ameyî awankerdiş, cinî tede xebityenê. Cinîya bi nameyê Perîşan Abî ya 4 serrî yo sera de xebityena dîyar kena ke bi keda xo berardiş kenê û cinîyan dir wextê xo derbaz kenê.

 

'Ma sebzeyê bi hormon nêxebitnenê'

 

Perîşane dana zanayîş ke seba debara xo sera de xebityenê û aşma tebaxe de firingî, îsot, xiyar, pîyanz û balîcanan ramnenê û kanûne de roşenê û wina va: "Ma nê berardişê cîya zî viraznenê. Ma tirşî zî viraznenê. Ma wişk kenê. Ma firingîyan rende kenê û dolaba qeşayî de nimnenê. Ma zimistanî de werdan de xebitnenê. Ma çîyê bi hormon nêxebitnenê."

 

'Dewa mi yena mi vîr'

 

Perîşane eynî wextî de da zanayîş ke wexto ke sera de xebityena dewa aye yena vîrê aye û arde ziwan ke cinîyê ke wazenê bixebityê wa bêrê bixebityê û hem debara xo bikerê û hem zî sebze seba xo kom bikerê.

 

Cinîya bi nameyê Delal Gule zî da zanayîş ke berardiş de xebata bi cinîyan dir tewr baş a û va aye karê xo zaf girîng vînena.