AMED - Konferanso ke bi şîarê ‘‘Rêxistinbîyayîşê ma azadîya ma ya‘‘ rayberîya pabesteyanê Tevgera Jinên Azad (TJA) de ame organîzekerdene û Meclîsê Cinîyan ê HDPyî zî tewrê ci bîyî, banê HDPyî yê Amedî de dest pêkerd.

 

Konferanso ke her bajarî ra cinîyî tewrê ci bîyî de fotografê Sêvê Demîre, Pakîze Nayire û Fatma Uyare yê ke hêrişê qirkerdişî yê qezaya Silopî ya Şirnexî de ameyîbî qetilkerdene û fotografê Sakîne Cansize, Fîdan Dogene û Leyla Şaylemeze yê ke Parîs de ameyîbî qetilkerdene, ameyî daliqnayene.

 

Mesajê hemsereka KCDyî û parlamentera HDPyî ya Colemêrgî Leyla Guvena ke çalakîya grevê vêşanîya aye kewte roja xo ya 24ine, konferans de ameye wendene.

 

Leyla Guvene ra mesaj

 

Leylaye mesajê xo de wina va: ‘‘Ez konferansê şima silam kena. Yê ke teber de paştî danê mi û cinîyê ke seba mi xover danî înan silam kena. Bitaybetî zî Mayanê Aşitî rê heskerdiş û silamanê xo şawena. Mi seba protestokerdişê zulm û tecrîdê serê şarî kurdî dest bi na çalakîye kerde û ez do heta serkewtiş dewam bikerî. Ez zana ke ma biheq ê û ma do qezenc bikerê.‘‘