COLEMÊRG - Herêma Colemêrgî bi hingimênê xo yê pakî û xozayî bi name û veng a. Labelê emserr qedexeyê herêman û xebetnayîşê maddeyê kîmyewî vera herême de bi hezaran mozê hingimênî merdî û berardiş goreyê serranê verênan hîna kêmî bîyo. Derheqê mergê mozê hingimênî û qirkerdişê xozayî de Hatayî Demîre qisey kerde. Hatayîye dîyar kerde ke eke wina dewam bikero do ameyox de mozê hingimênî çin bibî.

 

Her serre Colemêrgî de bi desan herêmanî yenî qedexekerdiş. Herêma Colemêrgî bi hingimênê xo yê pakî û xozayî bi name û veng a. Labelê emserr qedexeyê herêman û xebetnayîşê maddeyê kîmyewî vera herême de bi hezaran mozê hingimênî merdî û berardiş goreyê serranê verênan hîna kêmî bîyo. Derheqê mergê mozê hingimênî û qirkerdişê xozayî de Hatayî Demîre qisey kerde. Hatayîye dîyar kerde ke eke wina dewam bikero do ameyox de mozê hingimênî çin bibî.

 

'Qirkerdişê xozaya Kurdistanî vera bi hezaran mozê hingimênî merdî'

 

Hatayîya ke badê îxraçkerdişê xo Erzorim de dest bi wayîrkerdişê mozê hingimênan kerde qiseykerdişê xo de dîyar kerde ke texrîbatê xozayî vernîyê berardişî padano, heywanan û heme gandaran kişeno û wina va: “Eke wina dewam bikero û vernîya texrîbatan nêro padayîş do ameyox de mozê hingimênî nêmanî. Ez nika bi wayîrkerdişê mozan debara xo kena û karê xo ra zaf kêfweş a. Emserr qedexe û pêrodayîşan vera mozê hingimênî zirarêko pîl dîyî û goreyê serranê verênan berardiş kêmî bî. Emserr xoza de texrîbatê girdî virazîyayî. Daristanî ameyî veşênayîş û zozanî ameyî qedexekerdiş. Nê çîyî qirkerdiş î. Qirkerdişê xozaya Kurdistanî vera bi hezaran mozê hingimênî merdî. Mozê ke mendî zî kêmî yî.”

 

 ‘Eke moz çin bî, do mîyanê 4 serran de merdimî bimirî’

 

Hatayîye dewamê qiseykerdişê xo de bale ante çinbîyayîşê mozê hingimênan ser û wina va: “Îqtîdar sîstemê xozayî parçe kerd. Albert Einstein vano, ‘Eke moz çin bî, do mîyanê 4 serran de merdimî bimirî.’ Bi nê vatişan mesajê wayîrvejîyayîş û pawitişê xozayî dayo merdiman. Labelê îqtîdaro bîyaye bi parçekerdiş û talankerdişê sîstemê xozayî sere dejneno. 2 serrî yo ke ez mozê hingimênan wayîr kena. Rewşa emserrî zaf xirab a û sey emserr qet mozî nêmerdî. Bi madeyê kîmyewî mozî mirenî. Wayîrkerdişê mozan û berardişê hingimênî lazimîya merdimîye ya.”

 

'Şer problemê heme merdiman o'

 

Hatayîye tewr peynî nê çîyan arde ziwan ser: “Seba ameyoxê merdimîye ganî mozê hingimênî bêrî pawitiş. Madeyê kîmyewî heme gandaran rê zirar o. Mudaxaleya xozaye de tena xoza nê heme gandarî mirenî. Şero ke xoza ser de yeno kerdiş problemê heme merdiman o. Ganî nêro vîrîkerdiş ke mozêk daxî hêzê pêroyê cuye yo. Eke heywanî çin bî, merdim zî çin î. Cok ra ganî wayîrvejîyayîşê xoza bêro kerdiş û mozê hingimênî bêrî pawitiş.”