Sozda Oremar

 

ŞEHBA - Kaya 16 domanan ke mecbur mendî Efrîn ra koçê dewa Babinisî yê Şehba bikerê, kaya bi nameyê ‘Efrînê ma’ ya û bi na kaye zî bêrîkerdiş û hesretê vera warê xo ramojnenê. Bi na kaye çimê domanan xoverdayîşê Efrînî reyke bîn zî yeno cuyayîş.

 

Seba hêrişê Hêzê Çekdarî yê Tirk (TSK) û komê girêdayê ci vera  bajarê Efrînî, bi hezaran domanî mecbur mendî ke herra xo terk bikerê û xeylê kampê Şehba û dewê derûdorê ci bî. Domanê ke mecbur mendî rastîyê şerî nas bikerî, kaya xo de hesretê vera Efrînî danê teber. Dewa Babinis de vengê domanan, dewe de kelecan û coşêke cîya anê meydan. 16 domanê ke merdimê yewbînan ê, hesretê xo yê Efrînî hewşêke keyeyêke de ramojnenê.

 

'Bêveng bê teyareyî yenê'

 

Emîne 10 serrî ya. Emîne kaykerdoxa sereyîn ê kaya. Emîne û Sozê pîlê keyeyî yê. Şehmuz, Demhat, Hemodê, Fehîme, Cemal, Kemal, Aya, Ahmet, Amara, Şîrîn, Arîn, Orîvan Fatma, Mizgîn huyenê. Mi înan demêke derg temaşe kerd. Domanî bê zanayîş kay kenê. Huyayîşêke wina weş ê Fehîmeye esta, wexto ke mi aye antêne mi ferq kerde.

 

Mi va ez wazena şima temaşe bikerî. Heme qutiyê konserve yê derûdorî kom kerdê û sey şuşe xebitnenê. Çaye danê yewbînan. Vaş anê û wewrd amade kenê. Emîne reyke de vana 'bêveng bê teyareyî yenê'. Heme vanê 'wa bêrê ma teyareyan ra nêtersenê'. Nameyê kaye zî ‘Efrînê ma’ bi.

 

'Ma do xo bipawê'

 

Babeta domanan zî hêrişê Tirkîye ya. Domanî vanê  ne, ‘Erdogan çete ardê Efrîn. Embazanê ma qetil kerdê. Keyeyê ma talan kerdê. Heme çîyê ma dizînayî.’ Emîne qîrena û vana: “Amade bê. Beno ke çete hema hêrişê ma bikerê. Ma do vejîyê serê qilêke pîl û xo bipawê."

 

Tewr peyîn Fehîme vana ‘Ma şêrê Efrîn’ û domanî nîşaneyê serkewtişî kenê û sloganê ‘Bicuyo xoverdayîşê Efrînî’ berz kenê.

 

https://www.youtube.com/watch?v=yTXPGAJphGk&feature=youtu.be